د ایران دولتي تلویزیون وایي، په کویټ کې یوه امریکایي اف-۱۵ ډوله جټ الوتکه د ایران د هوایي مدافعې تر ډزو وروسته رانسکوره شوې ده.
د کویټ د دفاع وزارت ویلي، د دوشنبې په سهار په کویټ کې څو امریکايي جنګي الوتکې راوغورځېدلې، خو عمله یې ژوندۍ پاتې ده. دا په داسې حال کې ده چې ایران په خلیج کې د دریمې ورځې لپاره خپلو بریدونو ته دوام ورکړی دی.
د دفاع وزارت یوه ویاند په یوه بیان کې وویل: "نن سهار څو امریکایي جنګي الوتکې راوغورځېدلې. دا تاییدوو چې د عملې ټول غړي ژوندي پاتې دي،" او زیاته یې کړه چې د پېښې د علت په اړه څېړنې روانې دي.
په بیان کې زیاته شوې: "چارواکو سمدستي د لټون او ژغورنې عملیات پیل کړل، عمله یې وژغورله او د طبي ارزونې او درملنې لپاره یې روغتون ته ولیږدوله. هغه یادونه وکړه چې د هغوی روغتیایي حالت باثباته دی."
په تهران کې د ټي آر ټي ورلډ خبریال د راپور له مخې، د ایران دولتي تلویزیون وایي چې په کویټ کې یوه امریکایي اف-۱۵ ډوله جټ الوتکه د ایران د هوایي مدافعې د ډزو له امله رانسکوره شوې ده.
له دې وړاندې، په ټولنیزو رسنیو کې په پراخه کچه خپرو شویو ویډیوګانو کې ښودل شوي چې ښایي یوه امریکایي اف-۱۵ ډوله جنګي الوتکه په کویټ کې رالوېدلې وي، په داسې حال کې چې چارواکو د الوتکې د جزئیاتو په اړه کوم رسمي تایید نه دی کړی.
هغه ویډیوګانې چې په ټولنیزو رسنیو کې په پراخه کچه شریکې شوې، داسې ښکاري چې یوه جنګي الوتکه، چې ګومان کیږي د امریکا اړوند اف-۱۵ ډوله وي، رالوېدلې ده. په ویډیو کې داسې انځورونه هم شامل دي چې ادعا کیږي یو پیلوټ ښیي چې په پراشوټ سره راکښته شوی او په یوه ملکي موټر کې وړل کیږي.
