چین او کولمبیا د کمربند او سړک نوښت په اړه د ګډې همکارۍ یو پلان لاسلیک کړ، د دولتي رسنیو په وینا، دا اعلان د چهارشنبې په ورځ د بیجینګ په غونډه کې د دواړو مشرانو تر لیدنې وروسته وشو.
په وروستیو کلونو کې د سوداګرۍ زیاتوالی د بیجینګ نفوذ په لاتینې امریکا او کارابین کې زیات کړی، چې دا سیمه د متحده ایالاتو لپاره ستراتیژیک اهمیت لري.
چین د کولمبیا دویم لوی سوداګریز شریک دی، چې د متحده ایالاتو وروسته راځي، خو په دې وروستیو کې یې د کولمبیا د وارداتو تر ټولو لویه سرچینه ځای ناستې کړې ده.
د شینهوا خبري اژانس د خبر له مخې، ولسمشر شي جين پينګ خپل سيال ګوستاو پيټرو ته وويل، چين چمتو دی چې له کولمبيا څخه ډېر لوړ کيفيت لرونکي محصولات وارد کړي، هلته د پانګونې او سوداګرۍ په برخه کې د خپلو شرکتونو ملاتړ وکړي او د زيربناوو په جوړولو کې برخه واخلي.
‘د ۹.۲ میلیارده ډالرو پور’
د کولمبیا د بهرنیو چارو وزارت د چهارشنبې په ورځ له چین سره د دې تړون ستاینه وکړه او دا یې یو "تاریخي" ګام وباله.
وزارت په ایکس (پخوانی ټویټر) کې ولیکل: "کولمبیا او چین نن د کمربند او سړک نوښت لپاره د همکارۍ یو پلان لاسلیک کړ،" او دا یې یو "تاریخي ګام وباله چې د دواړو هېوادونو لپاره د پانګونې، ټکنالوژۍ همکارۍ او دوامداره پرمختګ نوي فرصتونه پرانیزي."
دا تړون د بیجینګ په غونډه کې د لاتینې امریکا د مشرانو د راټولېدو په څنډه کې وشو، چې په ترڅ کې یې شي جین پینګ د "پرمختګ" لپاره د ۹.۲ میلیارده ډالرو پور ژمنه وکړه.
پیټرو په ایکس کې ولیکل: "زموږ د بهرنیو اړیکو تاریخ بدلیږي. له دې وروسته به کولمبیا د نړۍ له ټولو هېوادونو سره د مساوات او آزادۍ په اساس اړیکې ولري."
د دوشنبې په ورځ پیټرو اعلان وکړ چې کولمبیا به د کمربند او سړک نوښت سره یوځای شي، چې په ۲۰۱۳ کال کې د شي جین پینګ لخوا د لرغوني ورېښمو لارې د بیا جوړولو او د چین د سوداګرۍ او زیربناوو اړیکو د پراختیا لپاره پیل شوی و.
له ۱۵۰ څخه زیات هېوادونه د دې پروګرام برخه دي، چې له دې جملې څخه له ۲۰ څخه زیات لاتینې امریکا هېوادونه شامل دي. خو په فبرورۍ میاشت کې پاناما اعلان وکړ چې له دې تړون څخه وځي، چې چین یې لامل د متحده ایالاتو فشار وباله.
پیټرو، چې په اګست ۲۰۲۲ کې واک ته ورسېد، په اکتوبر ۲۰۲۳ کې د ولسمشر په توګه خپل لومړی سفر چین ته وکړ، چې په ترڅ کې یې د دواړو هېوادونو اړیکې چې په ۱۹۸۰ کال کې پیل شوې وې، ستراتیژیکې همکارۍ ته لوړې شوې.
