د بلوچستان په زیارت ضلعه کې ترهګرو پر یوې امنیتي پوستې برید کړی چې له امله یې ۹ تنه پولیس وژل شوي دي. له دې برید وروسته د څو ساعتونو لپاره نښته شوې ده. تر اوسه کومې ډلې د دې برید مسؤلیت نه دی منلی.
یو چارواکي د سه شنبې په ورځ وویل چې د پاکستان په سویل لوېدیځ کې له ترهګرو سره په ټوله شپه نښته کې لږ تر لږه نهه پولیس سرتېري وژل شوي دي.
د زیارت ضلعې مرستیال کمیشنر عبدالقدوس اڅکزي خبریالانو ته وویل چې دا پېښه د بلوچستان ایالت په سیاحتي سیمه "زیارت" کې رامنځته شوې، چېرته چې د سه شنبې په لومړیو ساعتونو کې د پولیسو او وسله والو بریدګرو ترمنځ نښته وشوه.
اڅکزي زیاته کړه چې نښته وروسته له هغه پیل شوه چې څو تنو ترهګرو پر یوې امنیتي پوستې برید وکړ. هغه وویل چې د وژل شویو پولیسو جسدونه ځايي روغتون ته لېږدول شوي دي.
تر اوسه کومې ډلې د دې برید مسؤلیت نه دی منلی، خو ناقانونه ګرځول شوې ترهګره ډله بي ایل اې (BLA) له ډېرې مودې راهیسې په دې ناارامه سیمه کې پر امنیتي ځواکونو او دولتي تاسیساتو په بریدونو کې ښکېل ده.
له برید وروسته امنیتي ځواکونو په سیمه کې چاڼیز عملیات پیل کړي دي.
بلوچستان، چېرته چې د چین او کاناډا په څېر هېوادونو په بېلابېلو پروژو کې پانګونه کړې، له ډېرې مودې راهیسې د ترهګرۍ له ستونزې سره مخ دی.
