د تورکیې د ښځو ملي لوبډله د اتم ځل لپاره پرله پسې وروستي پړاو ته ورسېده، په داسې حال کې چې د نارینه وو لوبډلې د دې سیالیو په تاریخ کې د لومړي ځل لپاره پایلوبو ته لاره پیدا کړه.

د تورکیې والیبال د ۲۰۲۶ کال د والیبال ملتونو لیګ (VNL) کې یو تاریخي ګام پورته کړ؛ د دغه هېواد د ښځو او نارینه وو دواړو ملي لوبډلو پایلوبو  ته لاره وموندله. غوره روزنه او د لوبغاړو ترمنځ قوي همغږي د تورکیې د والیبال د دې تاریخي دوه ګونې بریا اصلي لاملونه بلل کېږي.

د ۲۰۲۶ کال د ملتونو لیګ د ښځو وروستی پړاو د چهارشنبې په ورځ د چین په مکاو سیمه کې پیلېږي، او تورکیه به خپله لومړۍ لوبه د پنجشنبې په ورځ د کاناډا پر وړاندې ترسره کړي.

تورکیې دا سیالۍ په برازیل کې د دومینیکن جمهوریت او بلغاریا په ماتولو سره پیل کړې، خو وروسته یې له هالنډ او ایټالیا څخه ماته وخوړه. په دویمه اونۍ کې، چې په انقره کې ترسره شوه، تورکیې جرمني، بلجیم، فرانسه او چین ته په ماتې ورکولو سره څلور واړه لوبې وګټلې. په دریمه اونۍ کې، تورکیې پولنډ، جاپان او ټایلنډ ته ماتې ورکړه، خو له متحده ایالاتو څخه یې ماته وخوړه. تورکیې لومړنی پړاو په څلورم مقام کې د ۹ بریاوو او ۲۵ نمرو په لرلو سره پای ته ورساوه.
د تورکیې د ښځو لوبډله به په کوارټر فاینل کې له کاناډا سره مخ شي؛ د کاناډا اوسنی روزونکی جیوواني ګویډټي تر دې وړاندې د تورکیې روزونکی و. تورکیې په خپلو وروستیو څلورو رسمي لوبو کې کاناډا ته ۳-۰ ماتې ورکړې ده. که تورکیه کاناډا ته ماتې ورکړي، په نیمه پایلوبه کې به د متحده ایالاتو او چین د لوبې له ګټونکي سره مخ شي. د یادونې وړ ده چې د تورکیې د ښځو ملي لوبډلې په ۲۰۲۳ کال کې د VNL اتلولي ګټلې وه.

د یوې تاریخي دوه ګونې بریا بشپړول
د تورکیې د نارینه وو ملي والیبال لوبډلې د خپل تاریخ په اوږدو کې د لومړي ځل لپاره وروستي پړاو ته په رسېدو سره تاریخ جوړ کړ. دوی په خپله وروستۍ لومړنۍ لوبه کې ایران ته ۳-۱ ماتې ورکړه او په جدول کې یې د ۸ بریاوو او ۲۲ نمرو په لرلو سره شپږم ځای خپل کړ.

په لومړۍ اونۍ کې، دوی کاناډا او فرانسه وګټل خو له امریکا او ایټالیا یې ماته وخوړه. په دویمه اونۍ کې یې چین، ارجنټاین او بلجیم ته ماتې ورکړه، خو له پولنډ څخه یې ۳-۲ ماته وخوړه. په دریمه اونۍ کې یې صربستان، اوکراین او ایران وګټل او یوازې له سلوانیا یې ماته وخوړه.

تورکیه به په کوارټر فاینل کې له سلوانیا سره مخ شي چې په لومړني جدول کې دریم ځای لري. د سربیايي روزونکي سلوبوډان کوواچ تر لارښوونې لاندې، چې د ۲۰۲۵ کال په جولای کې یې دنده پیل کړې، د تورکیې د نارینه وو لوبډلې د پام وړ پرمختګ کړی دی. د هغه تر مشرۍ لاندې، تورکیې په ۲۰۲۵ کال کې د لومړي ځل لپاره د نړۍ د اتلولۍ سیالیو کوارټر فاینل ته هم لاره موندلې وه.

د تورکیې تر څنګ، متحده ایالات، جاپان، ایټالیا او کوربه چین هغه هېوادونه دي چې د ښځو او نارینه وو دواړه لوبډلې یې کوارټر فاینل ته رسیدلي دي.