د روسیې د فدرالي امنیت ادارې خبر ورکړی چې د ټیلیګرام بنسټ اېښودونکی او اجراییوي رئیس پاویل دوروف یې "له ترهګریزو فعالیتونو سره په مرسته" تورن کړی او په اړه یې د نیولو نړیوال حکم صادر کړی دی.
د روسیې د فدرالي امنیت ادارې لخوا په خپره شوې اعلامیه کې ټینګار شوی چې د ټیلیګرام مدیریت هغه چینلونه او باټونه نه دي لیرې کړي چې په روسیه کې د ترهګریزو او ورانکارو کړنو په همغږۍ کې کارول کېدل.
په اعلامیه کې ویل شوي چې د دوروف په اړه له ترهګریزو فعالیتونو سره د مرستې په تور څېړنې روانې دي او په همدې تړاو د هغه د نیولو نړیوال حکم صادر شوی دی.
روسیې ویلي چې د اوکراین استخباراتي ادارې، ترهګرې او افراطي ډلې په ټیلیګرام کې له ګڼ شمېر چینلونو، ګروپونو او باټونو څخه په روسیه کې د ورانکارۍ، ترهګریزو بریدونو، ډله ییزو وژنو او سایبري درغلیو د پلانولو او همغږۍ لپاره کار اخلي.
په روسیه کې څه موده وړاندې پر ټیلیګرام بندیز لګول شوی و او پر دغه شرکت تر اوسه د ۱۰۰ میلیونو روبلو څخه ډېرې نغدي جریمې هم لګول شوې دي.
د کرملین ماڼۍ ویاند، دمیتري پیسکوف، د جولای په ۲۷مه وویل چې د ټیلیګرام د بیا فعالولو په اړه خبرې اترې روانې دي، خو د دغه شرکت استازي په دې پروسه کې پوره ونډه نه اخلي.
ټیلیګرام په روسیه کې د پیغام رسونې او ټولنیزو رسنیو یو له خورا مشهورو او ډېر کارېدونکو اپلیکیشنونو څخه شمېرل کیږي.
