لبناني رسنۍ راپور ورکوي چې جنګي الوتکو د بیروت په جنوبي څنډو کې دوه استوګنې اپارتمانونه بمبار کړي دي.

د اسرائیل پوځ د روان اوربند سره سره د لبنان د پلازمېنې بیروت په جنوبي څنډو (ضاحیه) کې هوايي بریدونه کړي دي.

د لبنان دولتي خبري اژانس (NNA) راپور ورکړی چې دغه بریدونه د یکشنبې په ورځ د "حوته الغدیر" په سیمه کې پر دوو ودانیو کې دوه استوګنې اپارتمانونه په نښه کړل چې له امله یې څو کسان ټپیان شول.

د اناتولیا خبري اژانس خبریال ویلي چې اسرائیي جنګي الوتکو له کومې مخکینۍ خبرتیا پرته پر ضاحیه سیمه بمباري وکړه او له نښه شوې سیمې څخه د لوګیو لوخړې پورته کېدې.

پر اېکس (X) ټولنیزه شبکه کې په یوه پیغام کې، د اسرائیل د پوځ ویاند اویچای ادرعي ادعا وکړه چې پوځ په سیمه کې د حزب الله د زیربناوو یو مرکز په نښه کړی دی.

د اسرائیل د قاتل لومړي وزیر بنیامین نتنیاهو او د دفاع وزیر اسرائیل کاټز په یوې ګډې اعلامیه کې ادعا شوې چې دا برید د یکشنبې په سهار پر شمالي اسرائیل د حزب الله د راکټي بریدونو په ځواب کې شوی دی.

د اسرائیل دولتي ټلوېزیون (KAN) ویلي چې اسرائیل تر برید وړاندې متحده ایالاتو ته خبر ورکړی و.

د یکشنبې ورځې دا بریدونه پر لبنان د جون له ۳مې نېټې راهیسې لومړي بریدونه وو؛ دا هغه نېټه وه چې په واشنګټن کې د امریکا په منځګړیتوب د اسرائیل او لبنان ترمنځ تر خبرو وروسته اوربند وغځول شو.

تر دې وړاندې د اسرائیل د مالیې وزیر بتسلیل سموتریچ له پوځ څخه غوښتي وو چې پر ضاحیه سیمه بریدونه وکړي.

اسرائیل په لبنان کې خپلو هوايي بریدونو ته دوام ورکړی، چې د مارچ له ۲مې نېټې راهیسې یې تر ۳۵۵۰ ډېر کسان وژلي او له ۱۰۸۰۰ څخه ډېر نور یې ټپیان کړي دي.