د ایران او یمن له لوري د توغندیو له توغول کېدو وروسته اسرائیل ادعا کړ چې هوايي دفاعي سیسټمونو راتلونکي توغندي شنډ کړل. د بله پلوه اسرائیل په ایران کې ځینې هدفونه وویشتل او په ماهشهر کې یې پر یوه پتروشیمي کمپلیکس د بریدونو راپور ورکړ.
د دوشنبې په ورځ له ایران څخه د توغندیو له توغول کېدو وروسته د اسرائیلو په مرکزي او سویلي څو ښارونو کې د خطر زنګونه (سایرنونه) وغږول شول. اسرائیلي پوځ په یوه بیان کې ویلي چې له ایران څخه راتوغول شوي توغندي کشف کړي او هوايي دفاعي سیسټمونه د راتلونکو توغندیو د شنډولو لپاره کار کوي.
د توغندیو د بریدونو له امله په اشغال شوي ختیځ بیت المقدس او اشغال شوې لوېدیځه غاړه کې هم د خطر زنګونه اورېدل شوي دي. په اسمان کې د چاودنو غږونه هغه مهال واورېدل شول کله چې د اسرائیلو هوايي دفاعي سیسټمونو د توغندیو د شنډولو هڅه کوله.
اسرائیلي پوځ تر دې وړاندې د اوربند سربېره د لبنان د پلازمېنې بیروت په ضاحیه سیمه کې هوايي برید کړی و، چې ایراني چارواکي یې غبرګون او بدل اخیستلو ته وهڅول. له ایران څخه د شپې په دریو څپو کې توغول شویو توغندیو د اسرائیلو په څو شمالي ښارونو کې د خطر زنګونه وغږول، او ویل کېږي چې د اسرائیلو په لور شاوخوا ۱۰ توغندي ویشتل شوي دي. اسرائیلي پوځ دا هم ویلي چې د ایران لوېدیځې او مرکزي برخې یې په نښه کړې دي.
اسرائیلو له یمن څخه د یوه توغندي له شنډولو وروسته په موقتي ډول خپله هوايي فضا وتړله
د ۱۲م چینل د راپور له مخې، اسرائیلو د دوشنبې په ورځ له یمن څخه د یوه توغندي له شنډولو وروسته خپله هوايي فضا په موقتي ډول وتړله. اسرائیلي پوځ وویل چې دا توغندی یې وروسته له هغه شنډ کړ چې په لوی تل ابیب او د اسرائیلو په مرکزي او سویلي برخو کې د خطر زنګونه وغږول شول.
دا پرمختګونه په داسې حال کې رامنځته کېږي چې سیمه ییزه کړکېچ وروسته له هغه زیات شو چې ایران د یکشنبې په ناوخته د بیروت په سویلي څنډو کې د اسرائیلو له برید وروسته د اسرائیلو شمال ته څو توغندي وویشتل. اسرائیلو وروسته په لوېدیځ او مرکزي ایران بریدونه پیل کړل، چې په ترڅ کې یې په تهران، اصفهان او تبریز کې د چاودنو راپورونه ورکړل شول.
ایراني رسنۍ وايي اسرائیلو پر یوه پتروشیمي شرکت برید کړی دی
په همدې حال کې ایراني رسنیو وویل چې اسرائیلو د ایران په سویل لوېدیځ کې په ماهشهر کې پر یوه پتروشیمي شرکت برید کړی دی. دا بریدونه څو ساعته وروسته له هغه تبادله شول چې د امریکا ولسمشر ډونالډ ټرمپ د زغم غوښتنه وکړه.
ځايي رسنیو په ټیلیګرام کې لیکلي: "صهیونیسټي دښمن په ماهشهر کې د کارون پتروشیمي شرکت باندې هوايي برید کړی دی." د سرچینې په حواله، یوه سیمه ییز امنیتي چارواکي ویلي چې اسرائیلي توغندي پر دغه تاسیساتو لګېدلي دي.
د اسرائیلو پوځ هم تایید کړه چې د ایران په سویل لوېدیځ کې یې په ماهشهر کې د پتروشیمي په یوه کمپلیکس کې څو هدفونه ویشتلي دي. پوځ وویل: "لږ وخت وړاندې، د اسرائیلو هوايي ځواک د ماهشهر په پتروشیمي کمپلیکس کې څو هدفونه په نښه کړل."
