تهران وایي ځواکونو یې یوه امریکایي جنګي کښتۍ ویشتلې او د هرمز په اوبو کې یې د خپل کنټرول پر زیاتېدو ټینګار کړی، خو واشنګټن په دغه ستراتیژیک دهلېز کې د کړکېچ له زیاتېدو سره سره دا ادعا ردوي.
ایران وویل چې د هرمز په تنګي کې یې د امریکا د سمندري ځواک یوه کښتۍ په نښه کړې ده، هغه ادعا چې واشنګټن سمدستي رد کړه. په ورته وخت کې تهران یوه نوې نقشه خپره کړه چې په دغه ستراتیژیکه اوبلاره کې د مهمو سمندري سیمو پر کنټرول ټینګار کوي.
د نورو جزیاتو په ورکولو سره، ایراني رسنیو د دوشنبې په ورځ راپور ورکړ چې د هیواد په سویل کې د جاسک ټاپو ته نږدې پر امریکایي جنګي کښتۍ دوه توغندي لګیدلي دي. د نیمه دولتي "فارس" خبري اژانس په وینا، دا برید وروسته له هغه وشو چې کښتۍ درېدو ته د دوی خبرداری له پامه وغورځاوه.
فارس اژانس د سیمه ییزو سرچینو په حواله لیکلي: "دې کښتۍ چې نن یې د هرمز په تنګي کې جاسک ته نږدې د تګ راتګ او بېړۍ چلولو امنیتي مقررات مات کړي وو، د ایران د سمندري ځواک له خبرداري وروسته پرې توغندیز برید وشو." د راپور له مخې، کښتۍ د برید له امله ونه توانېده خپلې لارې ته دوام ورکړي او "مجبوره شوه چې بېرته وګرځي او له سیمې وتښتي." د زیان یا ممکنه مرګ ژوبلې په اړه نور جزئیات نه دي ورکړل شوي.
تر دې وړاندې سپاه پاسداران خبرداری ورکړی و چې هره کښتۍ چې په هرمز تنګي کې د تهران لخوا صادر شوي ټرانزیټي پروتوکولونه مات کړي، "په زور به ودرول شي."
امریکا د خپلې جنګي کښتۍ ویشتل رد کړل
د امریکا یوه لوړپوړي چارواکي دا ادعا رد کړې چې ګواکې ایراني توغندي په امریکایي کښتۍ لګیدلي دي. دا خبر د "اکسیوس" خبریال باراک راویډ د دوشنبې په ورځ خپور کړ.
امریکا او اسرائیل د فبرورۍ پر ۲۸مه پر ایران بریدونه کړي وو، چې ورپسې تهران د اسرائیل او په خلیج کې د امریکا د متحدینو په وړاندې غچ اخیستونکي بریدونه وکړل او د هرمز تنګی یې وتاړه. واشنګټن د اپریل له ۱۳مې راهیسې پر ایراني کښتیو سمندري محاصره لګولې ده. که څه هم د پاکستان په منځګړیتوب د دوه اونیو لپاره اوربند اعلان شوی و، خو د تلپاتې سولې په اړه هوکړه ونه شوه. ټرمپ وروسته د پاکستان په غوښتنه دا اوربند وغځاوه.
ایران د هرمز په تنګي کې د خپل کنټرول نوې نقشه خپره کړه
په همدې حال کې د ایران سپاه پاسداران نن یوه نوې نقشه خپره کړه چې په کې د هرمز تنګي هغه سیمې په نښه شوې چې د دوی تر کنټرول لاندې دي.
د فارس خبري اژانس د راپور له مخې، دغه ټاکل شوې سیمه د دوو سمندري کرښو ترمنځ غځېدلې ده: یوه کرښه د ایران د قشم ټاپو له لویدیځې برخې څخه د متحده عربي اماراتو تر "ام القوین" پورې، او بله کرښه د ایران له "کوه مبارک" څخه د متحده عربي اماراتو د فجیره تر سویلي سیمو پورې ده. لا تر اوسه دا نه ده څرګنده چې د ادعا شوې سیمې کنټرول تر کومې کچې بدلون موندلی دی.
