بریتانیا هغه افغان کډوال زنداني کړ چې د سخت دریځه ښي اړخي مشر فراج یې په مرګ ګواښلی وو.

د بریتانیا یوې محکمې د سه‌شنبې په ورځ یو افغان کډوال د ټیک ټاک د یو  پوسټ  له لارې سخت دریځه او د کډوالو ضد سیاسي مشر نایجل فراج ته د مرګ د ګواښ له امله په  پنځو کلونو بند محکوم کړ.

۲۶ کلن فیاض خان د ۲۰۲۴ کال په اکتوبر کې په یوه ویډیو کې د 'ریفورم یو کې' ګوند د مشر فراج چې د  هغه ګوند چې په نظرپوښتنو کې یې محبوبیت مخ پر زیاتېدو وو په مرګ ګواښلی وو.

دغه کډوال له فرانسې څخه د انګلیس کانال له لارې د خپل سفر په اړه پر انټرنېټ پوسټونه کړي وو او بریتانیا ته په یوې وړې کښتۍ کې له رسېدو وروسته د اکتوبر په ۳۱مه ونیول شو.

خان ته د سه‌شنبې په ورځ بریتانیا ته په ناقانونه توګه د ننوتلو له امله هم سزا واورول شوه.

فراج د سه‌شنبې د ورځې د سزا هرکلی وکړ، خو ویې ویل چې دی "ډېر، ډېر اندېښمن دی چې دا سړی به په ۱۸ میاشتو کې ازاد شي."

د ریفورم ګوند مشر د محاکمې پر مهال د ساوک کراون محکمې ته ویلي وو چې دا ویډیو یې "ډېره وېروونکې" بللې وه او له وسلو سره د تورن له ښکاره مینې څخه "په رښتیا اندېښمن" و.

دا ګواښ وروسته له هغه وشو چې فراج د ۲۰۲۴ کال د اکتوبر په ۱۲مه یوه ویډیو خپره کړه او پکې یې بریتانیا ته د راتګ لپاره د خان د هڅو په اړه د هغه د ټولنیزو رسنیو پوسټونه په ګوته کړي وو.

دوه ورځې وروسته خان یو ټیک ټاک ویډیو خپره کړه چې فراج ته یې په خطاب کې ویلي وو چې دی بریتانیا ته راځي ترڅو "ستا له خور سره واده وکړي."

هغه زیاته کړه: "زه انګلستان ته راځم. زه به ډز، ډز، ډز وکړم." (I'm going to pop, pop, pop)

څارنوال پیټر راټلیف د منصفه پلاوي غړو ته وویل چې کله خان "ډز، ډز، ډز" ویل، "په لاس یې د ټوپک اشارې کولې" او همدارنګه یې په کمره سر وهلی و.

هغه دا هم وویل چې خان پر خپل مخ د AK-47 ټوپک ټاټو ته اشاره وکړه "ترڅو ټینګار وکړي چې ټوکې نه کوي."

کله چې ورته سزا اورول کېده، خان په محکمه کې پر فراج غږ وکړ: "زه غواړم افغانستان ته بېرته لاړ شم، ما افغانستان ته ولېږئ، زما کورنۍ په افغانستان کې ده."

"ته غواړې ما وکاروې ځکه چې غواړې لومړی وزیر شې."

پولیسو محکمې ته وویل چې خان له ۲۰۱۹ کال راهیسې په سویډن کې اوسېده او په ټولنیزو رسنیو کې یې ډېر مینه وال لرل.

محکمې ته وویل شول چې خان برتانوي چارواکو ته له رسېدو وروسته ناسم نوم ورکړی و، او دا چې سویډني چارواکي په دې باور دي چې د هغه نوم فیاض حسیني دی او ۳۱ کلن دی.

قاضي وویل چې هغه خپل اصلي  نوم ددې له امله نه وو پټ کړی چې له خپلو "دښمنانو" څخه پټ شي، بلکې ځکه یې پټ کړی وو چې "په سویډن کې یې جرمي سابقه" درلوده.