پاکستاني ځواکونو په خیبرپښتونخوا ایالت کې د عملیاتو پر مهال د ۲۳ تنو ترهګرو د وژلو نه خبر ورکړی دی.
د پاکستان پوځ د پنجشنبې په ورځ وویل، امنیتي ځواکونو د هیواد په شمال لویدیځ کې د پاکستاني طالبانو په دوه پټنځایونو چاپې وهلي، چې له امله یې سختې نښتې شوي او ۲۳ وسله وال پکې وژل شوي دي.
د پوځ په لیکو کې د مرګ ژوبلې په اړه کوم جزئیات نه دي ورکړل شوي. د پوځ د یوې اعلامیې له مخې، دا چاپې د چهارشنبې په ورځ د خیبر پښتونخوا ایالت په کرمه ولسوالۍ کې ترسره شوې. دا عملیات د دې اونۍ په پیل کې په شمال لویدیځ پاکستان کې د ترسره شویو هغو چاپو په تعقیب ترسره شوي چې پوځ پکې د ۳۸ وسله والو د وژلو خبر ورکړی و.
د ویلو ده چې پاکستاني ځواکونو پدې وروستیو کې د پاکستاني طالبانو لخوا د امنیتي ځواکونو پر خلاف د بریدونو د زیاتولو نه وروسته په ځانګړې توګه په خیبرپښتونخوا ایالت کې عملیات ډیر کړي دي.
پاکستان ادعاء کوي چې پاکستاني طالبان خپل ډیری بریدونه د افغانستان نه تنظیموي او ددې ډلې ډیری مشران په افغانستان کې میشت دي خو افغانستان بیا دا ادعا په کلکه توګه ردوي.
پاکستان څه موده مخکې د خپلو همدې ادعاګانو له مخې په افغانستان کې په څو نقطو هوايي او د بې پیلوټه الوتکو بریدونه وکړل چې دې بریدونو د افغانستان او پاکستان ترمنځه د نښتو لامل شو. د دواړو هیوادونو ترمنځه په نښتو کې په لسګونو تنو ژوند د لاسه ورکړ.
وروسته د قطر او تورکیې په منځګړیتوب د افغانستان او پاکستان ترمنځه اوربند وشو.
د پاکستان او افغانستان ترمنځ اوربند د اکتوبر له ۱۹مې راهیسې تر ډیره په خپل ځای پاتې دی، کله چې دواړو لورو په سرحدي پوستو د ډزو تبادله وکړه او وروسته قطر د یو اوربند منځګړیتوب وکړ. دا نښتې وروسته له هغه پیل شوې چې کابل پر اسلام آباد تور پورې کړ چې د اکتوبر په ۹مه یې په افغان پلازمینه کې د بې پیلوټه الوتکو بریدونه کړي چې له امله یې یو شمیر کسان وژل شوي وو.
