ایران وايي له امریکا سره د جګړې پای ته رسولو هوکړه تر بل هر وخت نږدې شوې ده. دا څرګندونې وروسته له هغه کېږي چې ډونالډ ټرمپ د ایران د هغو رسنیو پر راپورونو سخت غبرګون وښود چې د هوکړې د مسودې جزئیات یې خپاره کړي وو.
د ایران د بهرنیو چارو وزیر ویلي چې له متحده ایالاتو سره د جګړې د پای ته رسولو هوکړه تر بل هر وخت نږدې شوې ده. په ورته وخت کې، یو جګپوړي امریکايي چارواکي او منځګړي هېواد پاکستان هم د یوې احتمالي هوکړې په اړه خوشبیني څرګنده کړې ده.
خو په ښکاره ډول، د دواړو لورو مذاکراتي دریځونه لا هم یو له بل څخه لرې ښکاري. د ایران دولتي رسنیو د هوکړې د هغو مادو په اړه معلومات خپاره کړي چې ګواکې پرې خبرې روانې دي، خو دا معلومات د واشنګټن له هغو "سرو کرښو" سره په ټکر کې دي چې له پخوا یې ټاکلې وې.
د اونیو راهیسې د ناندرۍ ډکو مذاکراتو په لړ کې، چې کله ناکله پکې د ګواښونو او ډزو تبادله هم شوې، ولسمشر ډونالډ ټرمپ په مکرر ډول ټینګار کړی چې هوکړه لاسلیک کېدو ته نږدې ده، خو خبرې اترې لا هم بې پایلې غځېدلې دي.
ټرمپ، چې د پنجشنبې په ورځ یې هم د هوکړې د نږدېوالي خبره کړې وه، د جمعې په ورځ پر تهران سختې نیوکې وکړې او هغوی یې د ایران د رسنیو د راپورونو له امله په "بده نیتۍ" تورن کړل. ټرمپ په ټولنیزو رسنیو کې ولیکل چې دا راپورونه له هغو شرایطو سره "هیڅ تړاو نلري" چې په لیکلې بڼه پرې توافق شوی و. هغه زیاته کړه: "دوی ډیر د نه باور وړ خلک دي، ښه به وي چې ژر تر ژره خپل چلند سم کړي!"
خو د ایران د بهرنیو چارو وزیر عباس عراقچي دغه ناندرۍ کم اهمیته وبللې. هغه په خپل یو پیغام کې ولیکل: "د اسلام آباد د تفاهم یادښت تر بل هر وخت نږدې شوی دی." هغه له رسنیو وغوښتل چې د هوکړې د منځپانګې په اړه له اټکلونو ډډه وکړي او زیاته یې کړه چې ټول جزئیات به په مناسب وخت کې له ولس سره شریک شي. ټرمپ وروسته د عراقچي دغه پیغام په خپله پاڼه کې هم خپور کړ.
د ایران د بهرنیو چارو وزارت ویاند اسماعیل بقایي د ټرمپ د "بدې نیتۍ" تورونه رد کړل او ویې ویل چې له واشنګټن سره پر "ډېری ټکو" هوکړه شوې ده. هغه وویل: "موږ پایلې ته د رسېدو په وروستیو پړاوونو کې یو."
'۱۰۰ سلنه نه ده'
د پاکستان لومړي وزیر شهباز شریف، چې هیواد یې په دې خبرو کې کلیدي منځګړی دی، تایید کړه چې "د سولې د هوکړې یو وروستی او پرېکړه شوی متن چمتو شوی دی." شریف وویل: "سوله تر بل هر وخت اوس ډیره نږدې ده."
یو جګپوړي امریکايي چارواکي هم هیله وښوده چې دواړه لوري به په راتلونکو څو ورځو کې دا هوکړه لاسلیک کړي. هغه وویل: "که نن سهار له ما د دې هوکړې د لاسلیک په اړه پوښتنه شوې وای، ما به ۷۵ سلنه ډاډ ورکړی و، خو اوس دا ډاډ ۸۰ تر ۸۵ سلنې پورې دی، که څه هم لا ۱۰۰ سلنه نه ده."
د سویس د بهرنیو چارو وزارت ویلي چې له دواړو لورو سره په اړیکه کې دي او وړاندیز یې کړی چې که دواړه لوري وغواړي، سویس چمتو دی د هوکړې د لاسلیک د مراسمو کوربه توب وکړي.
له بلې خوا، د امریکا متحد هیواد اسرائیل ادعا کوي چې ټرمپ ورسره ژمنه کړې چې په هره هوکړه کې به ایران له خپلو غني شویو اټومي موادو بې برخې کېږي، خو د ایران رسمي خبري اژانس 'ایرنا' وايي چې دا موضوع په خبرو کې بېخي مطرح شوې نه ده.
