د وینزویلا سترې محکمې د ولسمشر مرستیالې  ته 'په موقت ډول' د ولسمشرۍ د چارو د په غاړه اخیستو امر کړی دی

د وینزویلا سترې محکمې وروسته له هغې چې ولسمشر نیکولاس مادورو، د امریکايي ځواکونو له خوا وتښتول شو، مرستیالې ولسمشرې ډلسي روډریګز ته امر کړی چې "په موقت ډول" د دغه لاتیني امریکايي هېواد د ولسمشرۍ چارې په غاړه واخلي.

سترې محکمې حکم کړی چې روډریګز دې "د اداري چارو د تسلسل او د هېواد د هر اړخیزې دفاع د تضمین لپاره، د سرپرستې په توګه د ولسمشرۍ له مقام سره تړلي ټول واکونه، دندې او صلاحیتونه په غاړه واخلي او عملي یې کړي."

قاضیانو له دې ډډه وکړه چې مادورو د تل لپاره له خپلې دندې غیر حاضر اعلان کړي، ځکه دا هغه حکم دی چې په ۳۰ ورځو کې دننه د ټاکنو ترسره کول اړینوي.

د یادولو وړ ده چې امریکا تیره ورځ د وینزویلا ولسمشر نیکولاس مادورو د ځانګړو پوځي عملیاتو په ترڅ کې په پلازمینه کاراکاس کې ونیو او له هیواده يي وتښتو.

د امریکا ولسمشر ډونالډ ټرمټ د خپلې کابینې د جګړې او بهرنیو چارو وزیرانو په ګډون تیره ورځ خبري غونډې ته وویل چې د وینزویلا د ولسمشر مادورو د نیولو عملیات ډیر په بریالي توګه ترسره شو او هغه د خپلې میرمنې سره یو ځای د نیول کیدو نه وروسته د محاکمې لپاره امریکا ته راوړل شوی دی. ټرمپ وویل چې مادورو به په نیویارک کې محاکمه شي.

همداشان ټرمپ وویل چې د مادورو د نیول  کیدو نه وروسته به وینزویلا د امریکا لخوا اداره شي. هغه خپلو وزیرانو ته اشاره وکړه چې وینزویلا به ددوې لخوا اداره شي. ټرمپ په ښکاره توګه وویل چې وینزویلا په نړۍ کې د تیلو یو ټولو ستر بډایه هیواد دی او امریکا به د وینزویلا د تیلو په سکتور کې سترې پانګه اچونې وکړي.

ددې هیواد د تیلو نه به ډیر زیات عواید ترلاسه کړي چې پخپله پدې هیواد به يي هم مصرف کړي او امریکا به هم ترینه ګټه ترلاسه کړي.

ټرمپ په ښکاره وویل چې نه غواړي د وینزویلا مشري او اداره پخپله وینزویلایانو ته پریږدي.