افغانستان د پاکستاني بریدونو پر وړاندې د "مناسب او سنجول شوي غبرګون" ژمنه وکړه

د افغانستان د دفاع وزارت وايي په پکتیکا او ننګرهار کې شوي بریدونه له ملي حاکمیت او نړیوالو قوانینو سرغړونه ده؛ د پاکستان پوځ په پرله پسې تېري او استخباراتي ناکامیو تورنوي

د افغانستان د دفاع وزارت د یکشنبې په ورځ وویل چې پر خاوره یې د پاکستان د راپور شویو بریدونو ځواب به په "مناسب وخت" کې په "مناسب او سنجول شوي غبرګون" سره ورکړي.

دغه وزارت د امریکا پر ټولنیزې رسنۍ اېکس (پخواني ټویټر) دغه بریدونه "په کلکو ټکو" وغندل او هغه یې د ملي حاکمیت، نړیوالو قوانینو، د ښه ګاونډیتوب د اصولو او اسلامي ارزښتونو ښکاره سرغړونه وبلله.

وزارت ویلي، چې د ملکي او مذهبي مرکزونو په نښه کول د پاکستان د پوځ استخباراتي او امنیتي کمزورتیاوې په ډاګه کوي، او زیاته کړې یې ده چې "دا ډول پرله پسې تېري به هېڅکله هم د هغوی داخلي نیمګړتیاوې پټې نه کړي."

د افغان رسنیو او د پاکستان د اطلاعاتو وزارت د معلوماتو له مخې، پاکستاني ځواکونو د افغانستان په ختیځو او سوېل ختیځو څو سیمو کې هوايي بریدونه کړي دي.

د پاکستان د اطلاعاتو او خپرونو وزارت د یکشنبې په سهار پر اېکس ولیکل: "پاکستان د غچ اخیستونکي غبرګون په ترڅ کې، د استخباراتي معلوماتو پر بنسټ، د پاکستاني طالبانو  فتنة الخوارج  او د هغوی د اړوندو ډلو او د داعش پر مرکزونو بریدونه کړي.

اعلامیه زیاتوي چې دا بریدونه په پاکستان کې له وروستیو ځانمرګو بریدونو وروسته شوي دي.

په اعلامیه کې زیاته شوې: "پاکستان له موقت افغان حکومت څخه تمه لري او بیا ټینګار کوي چې خپل مسؤلیتونه ادا کړي او خوارجو او ترهګرو ته اجازه ورنکړي چې خاوره یې د پاکستان پر ضد وکاروي، ځکه چې د پاکستان د خلکو خوندیتوب او امنیت تر هرڅه لومړیتوب لري."

پاکستان د شنبې په ورځ په خیبر پښتونخوا کې د خپلو دوو امنیتي سرتېرو د وژل کېدو د غچ اخیستو ژمنه کړې وه او خبرداری یې ورکړی و چې له افغانستان څخه به هېڅ برید بې ځوابه پرېنږدي.