د سوریې ولسمشر احمد الشراع ددې خبرې په ټینګار وویل چې ،  د شخړو د حل او د سیمه ییزې او نړیوالې ثبات د پیاوړتیا لپاره خبرې اترې او ډیپلوماسي اړین وسایل دي.

نوموړي دغه څرګندونې د تورکیې د انتالیا کې د ډیپلوماسۍ د څلورمې غونډې په ترڅ کې وکړې، چې د جمعې په ورځ پیل شوې وه.

د شنبې په ورځ د سوریې رسمي خبري اژانس (سانا) د راپور له مخې، الشراع ټینګار وکړ چې د سوریې د عربي جمهوریت په دې قوي باور ولاړ دی چې خبرې اترې او ډیپلوماسي د شخړو د حل او د سولې او ثبات د پیاوړتیا تر ټولو اغېزمنې لارې دي.

الشراع دغه غونډه د نړیوالو مشرانو او چارواکو سره د سیمه ییزو او نړیوالو ننګونو په اړه د نظرونو د تبادلې لپاره یوه "ارزښتناکه موقع" وبلله.

نوموړي د سوریې د عربي جمهوریت د حاکمیت او ځمکنۍ بشپړتیا د درناوي پر اهمیت هم ټینګار وکړ، په داسې حال کې چې د سوریې پر خاوره د اسرائیلو سرغړونې دوام لري.

د اسرائیلو لخوا د سوریې د خاورې سرغړونې

الشراع  چې د ۲۰۲۴ کال په ډسمبر کې د اسد د رژیم له سقوط وروسته واک ته ورسېد، اسرائیلو په سوریه کې څو ځله بریدونه کړي، پرته له دې چې دمشق کوم غبرګون وښيي. اسرائیلو د سوریې په خاوره کې د ملګرو ملتونو تر څار لاندې سیمه هم نیولې، د دې په پلمه چې د نیول شوي جولان لوړو امنیت خوندي کړي.

په وروستیو میاشتو کې د اسرائیلو هوایي بریدونه په سوریه کې نږدې ورځنۍ بڼه خپله کړې، چې د سوریې د پوځ ځایونه، د وسلو زېرمې او زیربناوې په نښه کوي، چې له امله یې ملکي وګړي وژل شوي او د سوریې د پوځ وسایل زیانمن شوي دي.

اسرائیلو د ۱۹۶۷ کال راهیسې د سوریې د جولان لوړې نیولې دي او د سوریې په سیاسي بدلونونو یې ګټه اخیستې، ترڅو په هغو سیمو کې خپل کنټرول پراخ کړي چې مخکې بې وسلې شوې وې، او په دې توګه یې د ۱۹۷۴ کال د جلا کولو تړون بې اغېزې کړی دی.

الشراع د تورکیې ولسمشر رجب طیب اردوغان د تود هرکلي او د غونډې په اړه د ځانګړې پاملرنې لپاره مننه وکړه.

د درې ورځنۍ انتالیا ډیپلوماسي غونډه چې د جمعې په ورځ پیل شوه، د "په ټوټه شوې نړۍ کې ډیپلوماسي بیا ترلاسه کول" تر عنوان لاندې ترسره شوه، چې په کې د نړۍ له ګوټ ګوټ څخه مشران، ډیپلوماټان او سیاست جوړونکي ګډون کوي.