د ایران ولسمشر پزشکیان: ایران له امریکا، اسرائیلو او اروپا سره په 'هر اړخیزه جګړه' کې دی

پزشکیان: ایران له امریکا، اسرائیلو او اروپا سره په 'هر اړخیزه جګړه' کې دی
د ایران مشر پر امریکا، اسرائیلو او ځینو اروپايي هېوادونو تور ولګاوه چې د ایران د ړنګېدو ملاتړ کوي.

د ایران ولسمشر مسعود پزشکیان ویلي، چې ایران له امریکا، اسرائیلو او اروپا سره په "هر اړخیزه جګړه" کې دی.

پزشکیان د شنبې په ورځ د ایران د ستر مذهبي مشر علي خامنه اي پر رسمي وېبپاڼه په خپره شوې مرکه کې وویل: "موږ له امریکا، اسرائیلو او اروپا سره په هر اړخیزه جګړه کې یو."

هغه زیاته کړه: "دا جګړه د ۱۹۸۰ او ۱۹۸۸ کلونو ترمنځ له عراق سره تر جګړې ډېره خطرناکه، پېچلې او سخته ده."

د ایران مشر پر امریکا، اسرائیلو او ځینو اروپايي هېوادونو تور ولګاوه چې د ایران د ړنګېدو ملاتړ کوي.

"له عراق سره د جګړې پر مهال وضعیت روښانه و: هغوی توغندي توغول او موږ پوهېدو چې چېرته برید وکړو. خو نن، هغوی موږ له هرې خوا کلابند کړي یو، پر موږ فشار راوړي، زموږ سوداګري خنډوي، او په ټولنه کې په بېلابېلو برخو کې د خلکو هیلې لوړوي."

د جون میاشت کې له اسرائیلو سره د ۱۲ ورځنۍ جګړې پر مهال، د امریکا پوځ د بنکر شکن بمونو (bunker-buster bombs) په کارولو سره د ایران درې لویې اټومي اډې، فورډو، نطنز او اصفهان، په نښه کړې.

دا بریدونه له هغه څه باندې یوه اونۍ وروسته وشول چې اسرائیلو پر ایران برید وکړ، چې پکې لوړپوړي پوځي قوماندانان او اټومي ساینس پوهان ووژل شول او ځینې اټومي مرکزونه هم په نښه شول.