تورکیې یونان ته ماتې ورکړه او د یوروباسکېټ پایلوبې ته یې لاره پیدا کړه
تورکیې د لاتویا په پلازمېنه ریګا کې خپل پخواني سیال یونان ته د ۶۸ پر وړاندې د ۹۴ سره په لوی توپیر سره ماتې ورکړه او په خپل تاریخ کې یې د دویم ځل لپاره د یوروباسکېټ پایلوبې ته لاره پیدا کړه.
تورکیې لوبه په پیاوړي توګه پیل کړه او لومړی کوارټر یې د ۲۶ پر ۱۶ په پایلې سره په خپل نوم کړ؛ په دویم کوارټر کې یې هم پر یونان خپل ثابت برلاسی وساته او دا پړاو یې د ۲۳ پر ۱۵ په پایلې سره وګاټه.
د لوبې په نیمايي کې، تورکیه د ۴۹ پر ۳۱ په ټولیزې پایلې سره په لوبه کې په ښه دریځ کې وه.
په درېیم کوارټر کې د دواړو لوبډلو ترمنځ سیالي نږدې وه، خو تورکیې بیا هم د ۲۳ پر ۲۰ په پایلې سره د دریو نومرو لږ برلاسی وساته.
په وروستي کوارټر کې، تورکیې یو ځل بیا د ۲۲ پر ۱۷ په پایلې سره خپل برلاسی وساته.
تورکیې په پای کې د ۶۸ په پر وړاندې د ۹۴ لمبرو اغېزناکې ټولیزې پایلې سره بریا خپل کړ.
د تورکیې د باسکټبال ملي لوبډلې د ۲۰۲۵ کال د یوروباسکېټ نیمه پایلوبه نه یوازې په تلویزیون او ژوندۍ بڼه خپره شوه، بلکې د هېواد په کچه په ولایتونو او ولسوالیو کې په ۵۲ ځایونو کې پر لویو پردو هم وښودل شوه. د تورکیې د بریا نه وروسته په ټوله تورکیه کې د خوښۍ پراخ جشنونه پیل شول.
د تورکیې او یونان ترمنځ د یوروباسکېټ ۲۰۲۵ نیمه پایلوبه د لاتویا په پلازمېنه ریګا کې په "ریګا ارینا" لوبغالي کې ترسره شوه.
له دې وړاندې، آلمان د ۹۸ پر ۸۶ په پایلې سره فنلنډ ته ماتې ورکړې وه او نیمه پایلوبې ته یې لاره موندلې وه.
تورکیه به اوس د یکشنبې په ورځ، د سپټمبر پر ۱۴مه، په ریګا کې د اروپا د باسکټبال اتلولۍ په پایلوبه کې له آلمان سره مخامخ شي.
دا له ۲۴ کلونو اوږد انتظار وروسته دی چې تورکي مینه وال خپله لوبډله یو ځل بیا په پایلوبه کې ویني.
تورکیې په ۲۰۰۱ کال کې د یوروباسکېټ د سپینو زرو مډال ګټلی و، چې کوربتوب یې هم پخپله کاوه، وروسته له هغه چې په پایلوبه کې یې د یوګوسلاویا پر وړاندې د ۷۸ پر ۶۹ په پایلې سره ماتې وخوړه او دویم مقام یې خپل کړ.
