افغانستان د سوریې په حمص ښار کې پر جومات ترهګریز برید وغانده
افغانستان د سوریې په حمص ولایت کې د جمعې لمانځه پر مهال پر یوه جومات ترسره شوی ترهګریز برید غندلی او د دمشق له حکومت سره یې د پیوستون پیغام شریک کړی دی.
د افغانستان د بهرنیو چارو وزارت د دغه برید په اړه یوه اعلامیه خپره کړې ده.
په اعلامیه کې د برید غندنه شوې، د قربانیانو کورنیو ته د تسلیت مراتب وړاندې شوي او د سوریې له حکومت سره د پیوستون پیغام ورکړل شوی دی.
همدارنګه په اعلامیه کې ټپیانو ته د عاجلې شفا هیله شوې ده.
د سوریې په مرکزي برخه کې پراته حمص ولایت کې پرون د جمعې لمانځه پر مهال پر یوه جومات په بمي برید کې ۸ کسان وژل شوي او ۱۸ نور ټپیان شوي وو.
د سوریې د ولسمشر احمد الشرع د رسنیو سلاکار احمد موفق زیدان، له برید وروسته په خپلو څرګندونو کې ویلي وو چې "هغه کړۍ چې له ثبات څخه ناراضه دي، باید پوه شي چې د ګډوډۍ دوره نوره پای ته رسېدلې ده."
د برید مسئولیت تر اوسه کومې ډلې پر غاړه نه دی اخیستی.
