لوی اکثریت  آلمانان له اسرائیل سره د  پوځي ملاتړ مخالفت کوي او پر دوې  د ډیپلوماتیک فشار زیاتولو غوښتنه کوي.

د سې شنبې په ورځ یوې خپرې شوې نوې نظرپوښتنې له مخې، ډیری آلمانان له اسرائیل سره د خپل حکومت له پوځي ملاتړ سره مخالفت کوي.

د کوربر سټیفټونګ بنسټ په سپارښتنه د فورسا نظرپوښتنې ادارې لخوا ترسره شوې نظرپوښتنه ښیي چې ۸۲ سلنه آلمانانو په غزه کې د اسرائیل د وحشیانه جګړې لپاره د خپل هیواد پوځي ملاتړ سره سخت مخالفت کړی دی. یوازې ۱۵ سلنه خلکو یې ملاتړ څرګند کړی دی. نږدې درې پر څلورمه برخه (۷۳ سلنه) ځواب ویونکو ویلي چې د آلمان حکومت باید پر اسرائیل ډیر سخت ډیپلوماتیک فشار راوړي.

دغې سروې د آلمانانو په تاریخي مکلفیتونو کې هم یو بنسټیز بدلون په ډاګه کړی، چې ۶۰ سلنه ځواب ویونکو دا نظر رد کړی چې آلمان د خپل تاریخ او هولوکاسټ له امله د اسرائیل په وړاندې ځانګړی مسؤلیت لري. یوازې ۳۸ سلنه خلکو د دې دودیز دریځ ملاتړ کړی دی.

د فورسا نظرپوښتنې ادارې دا استازې سروې د سپتمبر له ۱۵ څخه تر ۲۶ مې نېټې پورې ترسره کړې او له ۱۵۰۰ څخه زیاتو آلمانانو سره یې مرکې کړې دي. دا په وروستیو میاشتو کې د هغو نظرپوښتنو له لړۍ څخه وروستۍ ده چې د منځني ختیځ د شخړې په اړه د حکومت د دریځ او د آلمان د خلکو د نظر ترمنځ مخ په زیاتیدونکي واټن په ډاګه کوي.

آلمان په وروستیو کلونو کې اسرائیل ته د وسلو یو له سترو عرضه کوونکو څخه دی. د ۲۰۲۳ کال د اکتوبر له ۷ مې څخه د ۲۰۲۵ کال د جون تر ۵ مې پورې، آلمان اسرائیل ته د ۴۹۲ ملیون یورو (۵۶۷ ملیون ډالرو) څخه د زیاتو وسلو د پلور اجازه ورکړې ده.

د آلمان لومړي وزیر، فریدریش مرز، چې د اسرائیل کلک ملاتړی دی، د اګست په میاشت کې د خلکو د ډیریدونکي فشار له امله اسرائیل ته د وسلو پر صادراتو محدودیتونه ولګول. دغو محدودیتونو د هغو وسلو لپاره د نویو صادراتي جوازونو تصویب وځنډاوه چې کیدای شي د غزې په جګړه کې وکارول شي. خو دا محدودیتونه په روانه اونۍ کې بیرته لرې کړل شول.

د آلمان د حکومت په وینا، د اسرائیل او حماس ترمنځ اوربند چې د اکتوبر په ۱۰ مه پیل شوی، لاهم پرځای دی او په وروستیو اونیو کې نور هم ټینګ شوی دی. حکومت همدارنګه په غزه کې د تلپاتې سولې او د بشري مرستو د زیاتوالي لپاره هڅو ته هم اشاره کړې ده.

په ورته وخت کې، په ملګرو ملتونو کې د فلسطین استازي، ریاض منصور، د دوشنبې په ورځ امنیت شورا ته وویل چې د اسرائیل پوځ د اکتوبر له ۱۰ مې راهیسې چې اوربند نافذ شوی، هره ورځ دوه فلسطینی ماشومان وژني، او د ټپیانو او وژل شویو شمیر ۱۰۰۰ ته رسیدلی دی.

په غزه کې د فلسطین د روغتیا وزارت د معلوماتو له مخې، د اوربند له پیل راهیسې لږ تر لږه ۳۴۲ فلسطینیان د اسرائیلي پوځ په ډزو وژل شوي او نږدې ۹۰۰ نور ټپیان شوي دي.