میلیونونه حاجیان د حج د کلنیو مراسمو په ترڅ کې په عرفات کې راټول شوي دي.
د سه شنبې په ورځ د حج د کلنیو مراسمو په تر ټولو مهمه برخه کې، شاوخوا ۱.۸ میلیونه حاجیان د سعودي عربستان په لوېدیځ کې د عرفات دښتو ته لاړل.

د سعودي عربستان د رسمي خبري اژانس (SPA) له مخې، امنیتي ځواکونو چې پر ټولو لارو او پیاده تګ‌راتګ ځایونو کې ګمارل شوي وو، د حاجیانو کاروانونه په دقت سره څارل ترڅو د تایید شوي پلان سره سم د ګڼې ګوڼې مدیریت وکړي.

عرفات د مکې تر څېرمه یوه غونډۍ ده چې حاجیان د حج په جریان کې هلته د دعا او تضرع لپاره راټولېږي، چې دا د حج د مراسمو تر ټولو مهم رکن ګڼل کېږي. یاد اژانس له مینا څخه عرفات ته د حاجیانو د تګ پر مهال د ترافیکو له خورا ارام او منظم بهیر څخه خبر ورکړی دی.

په عرفات کې به حاجیان په "نمره" جومات کې د ماسپښین او مازیګر لمونځونه په ګډه (جمع) او قصر ډول ادا کړي. د لمر له ډوبېدو وروسته به هغوی مزدلفې ته لاړ شي، هلته به د ماښام او ماسخوتن لمونځونه ادا کړي او تر سباوون پورې به هلته شپه تیره کړي.

دا غونډۍ هغه ځای دی چې حضرت محمد (ص) په کې په خپل وروستي حج کې د "حجة الوداع" خطبه ورکړې وه.

د حج مراسم په رسمي ډول د دوشنبې په ورځ په لوېدیځ سعودي عربستان کې مینا ته د حاجیانو په رسېدو سره پیل شول، چې هلته د حاجیانو د اسانتیا لپاره پراخ خدمات او امنیتي تدابیر نیول شوي دي. د حج په دغه شپږ ورځني فصل کې د سه شنبې په ورځ په عرفات کې درېدل (وقوف)، په مزدلفه کې شپه تېرول، د شیطانانو ویشتل (جمرات) او په مکه کې په مسجد الحرام کې د کعبې شریفې د الوداع طواف شامل دي.

دا مراسم له څو برخو څخه جوړ دي چې موخه یې د اسلامي عقیدې د اساسي مفاهیمو یادونه او د حضرت ابراهیم (ع) او د هغه د کورنۍ د ازمایښتونو نمانځل دي.

سعودي چارواکو د ۲۰۲۶ کال د حج د فصل لپاره تنظیمي او امنیتي اقدامات پراخ کړي دي، چې په هغې کې د حاجیانو د تګ راتګ د مدیریت او سپېڅلو ځایونو ته د غیر قانوني ننوتلو د مخنیوي لپاره له پرمختللو څارنیزو ټکنالوژیو او د ګڼې ګوڼې د څارنې سیسټمونو څخه کار اخیستل شامل دي.