د تورکیې ولسمشر رجب طیب اردوغان د امریکا له ولسمشر ډونالډ ټرمپ سره ټیلیفیوني خبرې وکړې.
د تورکیې د عامه اړیکو ریاست ویلي، د هېواد ولسمشر رجب طیب اردوغان د جمعې په ورځ د واشنګټن په غوښتنه د امریکا له ولسمشر ډونالډ ټرمپ سره ټیلیفوني خبرې کړې دي.
دواړو مشرانو د تورکیې او امریکا ترمنځ پر دوه اړخیزو اړیکو او همدارنګه په غزه کې پر وضعیت خبرې وکړې.
اردوغان یادونه وکړه چې واشنګټن ته یې وروستي سفر اړیکې نورې هم پیاوړې کړې دي، او په ټولو برخو کې، په ځانګړې توګه د دفاعي صنعت په برخه کې، د همکاریو د پراختیا لپاره یې د ګامونو پر اړتیا ټینګار وکړ.
د غزې په اړه، اردوغان وویل چې تورکیه نه یوازې په غزه کې، بلکې په ټوله پراخه سیمه کې د سولې او ثبات د ټینګښت لپاره په جدي توګه کار کوي. هغه د دې موخې لپاره د نړیوالو نوښتونو هرکلی وکړ او ټینګار یې وکړ چې تورکیې د سولې په لټه کې خپلې ډیپلوماتیکې اړیکې ګړندۍ کړې دي.
د تورکیې ولسمشر ټینګار وکړ چې د اسرائيلو د بریدونو درول په سیمه کې د تلپاتې سولې د ټینګښت د هڅو د بریا لپاره اړین دي.
