کوالالمپور وايي، دوی به په نړیوالو اوبو کې د "ګلوبل صمود" مرستندویه کاروان د درولو پر مهال د فعالانو د تښتولو او شکنجې په تور، د عدالت په نړیواله محکمه کې قانوني اقدام وکړي.
سیمه ییزو رسنیو د دوشنبې په ورځ راپور ورکړ چې د مالیزیا حکومت چمتو دی چې د غزې په لور د روان "ګلوبل صمود" بشري مرستو د کاروان د فعالانو د تښتولو او شکنجې په تور، اسرائیل د عدالت نړیوالې محکمې ته راکاږي.
د مالیزیا د سلانګور ایالت اعلی وزیر، امیرالدین شاري وویل چې کوالالمپور به د وکیلانو له خوا د معلوماتو او ملاتړ کونکو شواهدو د راټولولو له بشپړېدو سره سم دا حقوقي بهیر پیل کړي.
تېره اونۍ اسرائیلي ځواکونو په نړیوالو اوبو کې پر هغه کاروان برید وکړ او تر ۴۰۰ ډېر نړیوال فعالان یې ونیول چې غوښتل یې د غزې سمندري کلابندي ماته کړي او مرستې ورسوي.
امیرالدین د کوالالمپور په نړیوال هوايي ډګر کې د فعالانو د هرکلي په مراسمو کې وویل: "موږ به غلي پاتې نشو او نه به ودرېږو. په داسې حال کې چې زموږ حقوقي ډله د نړیوالو قوانینو د سرغړونو اسناد ټولوي، د دغه کاروان ګډونوال له یو ځل څخه ډېر وتښتول شول او شکنجه شول."
هغه زیاته کړه: "موږ به دا موضوع نړیوالې محکمې ته یوسو، ډیپلوماټیک فشار به جاري وساتو او په ټولې مالیزیا کې به هم کمپاین وکړو."
امیرالدین وویل چې دا قانوني اقدام د هغو وحشيانه کړنو په غبرګون کې ترسره کېږي چې په کې د کاروان د فعالانو، په ځانګړې توګه د مالیزیايي برخه والو تښتول او شکنجه کول شامل دي. هغه زیاته کړه چې د دې ګام ترڅنګ به حکومت ډیپلوماټیک فشار ته هم دوام ورکړي ترڅو د غزې د "بشپړې ازادۍ" غوښتنه وکړي.
نوموړي وویل که څه هم د دې ماموریت پړاو پای ته رسېدلی، خو د فلسطین له داعیې سره د مالیزیا او سلانګور ایالت ژمنه نه ختمېدونکې ده. هغه دا هم وویل چې په راتلونکي کې په مالیزیا کې د فلسطین په اړه د نړیوالو کنفرانسونو د جوړولو پلان لري او د "صمود ۳.۰" هڅې به تر هغه وخته روانې وي چې پر غزې لګول شوې کلابندي په بشپړه توګه لیرې شي.
