دمشق وايي چې د اسرائیلو مداخلې او بریدونه نړیوال قوانین، د ملګرو ملتونو منشور او د ۱۹۷۴ کال د ځواکونو د بېلوالي هوکړه نقض کوي.
سوریې د خپل هیواد په سویل کې د اسرائیلو تېری غندلی او ویلي یې دي چې د قنیطره او درعا ولایتونو ته د اسرائیلي ځواکونو ننوتل او توپچي بریدونه د دغه هېواد ملي حاکمیت تر پښو لاندې کوي.
د سوریې د بهرنیو چارو او کډوالو وزارت په یوه اعلامیه کې ویلي چې دغه بریدونه "ملکي وګړي ډاروي" او د نړیوالو قوانینو، د ملګرو ملتونو د منشور او د ۱۹۷۴ کال د ځواکونو د بېلوالي د هوکړې ښکاره سرغړونه ده.
په اعلامیه کې زیاته شوې چې د اسرائیلو دوامداره تېري کوونکي اقدامات د امنیت او ثبات د ټینګښت هڅې کمزورې کوي، په نښه شویو سیمو کې د ملکي وګړو کړاوونه زیاتوي او په سیمه کې د کړکېچ د لا زیاتېدو خطر رامنځته کوي.
د نړیوالې مداخلې غوښتنه
سوریې له ملګرو ملتونو او نړیوالې ټولنې څخه وغوښتل چې خپل مسوولیتونه ادا کړي او د دغو تکراري سرغړونو د پای ته رسولو لپاره اړین ګامونه پورته کړي.
دغه وزارت همداراز ټینګار وکړ چې د ځواکونو د بېلوالي هوکړې ته باید په داسې ډول درناوی وشي چې د سوریې ملي حاکمیت او ځمکنۍ بشپړتیا پکې خوندي وي.
د ۲۰۲۴ کال د ډسمبر په ۸مه د بشار الاسد د رژیم له نسکورېدو وروسته، اسرائیلو د ۱۹۷۴ کال د ځواکونو د بېلوالي د هوکړې د له منځه تللو اعلان وکړ او د پولې د سوریې په لور یې یوه حایله یا بې طرفه سیمه ونیوله. پدې وروستیو کې اسرائیلي ځواکونه او زغره وال ګاډي د درعا په کلیوالي سیمو کې لیدل شوي چې د 'جمله' او 'سیسون' ترمنځ ستراتیژیکه لاره یې نیولې ده.
