مسکو وايي چې د روسیې په سرحدي ښار برینسک کې د توغندیو د پرزو جوړولو پر یوې فابریکې د اوکراین په برید کې اووه کسان وژل شوي او په لسګونو نور ټپیان شوي دي؛ کییف وايي چې پوځي بنسټونه یې په نښه کړي دي.
د روسیې د بهرنیو چارو وزارت د چهارشنبې په ورځ د روسیې په لویدیځ ښار برینسک کې د اوکراین خونړی برید د یو "ترهګریز برید" په توګه وغانده او برتانیا یې تورنه کړه چې له نړیوالو حقوقي نورمونو څخه یې پښه اړولې ده، ځکه د مسکو په وینا په دې برید کې د برتانیا توغندي کارول شوي دي.
په یوه بیان کې، وزارت ویلي چې د دې برید هدف د سولې د پروسې په لور د هڅو ګډوډول او د جګړې زیاتول دي.
د برینسک سیمه ییز والي الکساندر بوګوماز د چهارشنبې په ورځ وویل چې په برید کې یو بل کس هم مړ شوی، چې په دې سره د مړو شمېر اووو ته ورسېد. بوګوماز وړاندې ویلي وو چې د سه شنبې په ورځ په دغه برید کې ۴۲ کسان ټپیان شوي، خو دا یې نه و ویلي چې دقیقاً کوم ځای ویشتل شوی دی.
اوکراین ویلي چې دوی د توغندیو د پرزو جوړولو یوه مهمه فابریکه ویشتلې ده، خو مسکو پر اوکراین تور پورې کړ چې په قصدي ډول یې ملکي وګړي په نښه کړي دي.54
