تورکیې ته پر لاره د ایران یو بالستیک توغندی شنډ کړای شو
د متحدینو هوایي دفاعي سیستمونو هغه بالستیک توغندی کشف او شنډ کړ چې د غازي عنتاب (Gaziantep) په لور روان و؛ انقرې د کړکېچ د زیاتېدو په اړه خبرداری ورکړ او ویې ویل چې د هېواد د هوایي حریم د ساتنې سیسټم په بشپړ ډول فعال دی.
په یوه اونۍ کې د تورکیې هوایي حریم ته د ایران د دوهم بالستیک توغندي ننوتلو دا وېرې زیاتې کړي چې په منځني ختیځ کې پراخېدونکی کړکېچ ښايي د ناټو (NATO) قلمرو ته هم وغځېږي.
د تورکیې د چارواکو په وینا، د ناټو هوایي دفاعي سیستمونو هغه بالستیک توغندی شنډ کړی چې له ایران څخه توغول شوی و او د تورکیې په لور روان و. دا په تېره یوه اونۍ کې دوهمه ورته پېښه ده چې د ایران توغندي د تورکیې هوایي حریم ته ننوځي.
د تورکیې د ملي دفاع وزارت د دوشنبې په ورځ وویل چې دا توغندی د مدیترانې سمندرګي په ختیځه برخه کې کشف او د متحدینو د هوایي او توغندیزو دفاعي سیستمونو لخوا وویشتل شو. د توغندي پاتې شوني د تورکیې په سویل ختیځ کې د غازي عنتاب ولایت په "شاهینبي ولسوالۍ کې لوېدلي دي. چارواکو ویلي چې په دې پېښه کې چا ته مرګ ژوبله نه ده اوښتې.
انقره د کړکېچ د زیاتېدو په اړه خبرداری ورکوي
د تورکیې د ارتباطاتو رئیس، برهان الدین دوران وویل چې توغندی تورکیې ته له رسېدو وړاندې "پر وخت کشف او شنډ کړای شو". هغه زیاته کړه چې حکومتي ادارو له لومړۍ شېبې دا پېښه له نږدې څارله او لازم امنیتي او دفاعي اقدامات یې تر سره کړي دي.
ښاغلي دوران وویل: "ټول اړونده واحدونه، په ځانګړې توګه د ملي دفاع وزارت په بشپړې همغږۍ سره عمل کوي." هغه ټینګار وکړ چې د تورکیې د هوایي حریم او پولو د امنیت ساتلو لپاره د دولت وړتیا او هوډ په لوړه کچه کې دی.
دوران د سیمې د وضعیت په اړه هم خبرداری ورکړ او له ټولو لورو، په ځانګړې توګه له ایران څخه یې وغوښتل چې له داسې اقداماتو ډډه وکړي چې سیمه ییز ثبات له خطر سره مخ کوي یا ملکي وګړي په نښه کوي.
هغه وویل: "دا خورا مهمه ده چې په سیمه کې تاوتریخوالی نور زیات نه شي او جګړه پراخو سیمو ته خپره نه شي."
نوموړي همداراز له هېوادوالو او رسنیو وغوښتل چې یوازې پر رسمي څرګندونو تکیه وکړي او د داسې ناتایید شویو معلوماتو له خپرولو ډډه وکړي چې په ټولنه کې د وېرې او ناسم پوهاوي لامل کېږي.
د دې توغندي شنډول د تېرې اونۍ له هغې پېښې وروسته کېږي چې یو بل ایراني توغندی هم د تورکیې فضا ته ننوتی و، چې دې چارې په ناټو کې د جګړې د خپرېدو اندېښنې راپارولې دي.
