د خوړو د بحرانونو د نړیوال راپور له مخې، جګړې د خوړو د سختې بېامنۍ اصلي لامل پاتې شوې دي. راپور زیاتوي چې د جګړو او اقلیمي بدلونونو له امله په ډېرو هېوادونو کې د وضعیت د خرابېدو احتمال شته، نو ځکه د ۲۰۲۶ کال لپاره لیدلوری "تیاره" ښودل شوی دی.
د راپور په وینا، د خوړو سخته بېامني په ۱۰ هېوادونو کې خورا زیاته ده چې عبارت دي له: افغانستان، بنګله دېش، د کانګو ډیموکراتیک جمهوریت، میانمار، نایجیریا، پاکستان، جنوبي سوډان، سوډان، سوریه او یمن.
په بنګله دېش او سوریه کې لږ ښه والی په افغانستان، کانګو، میانمار او زیمبابوې کې د وضعیت د خرابېدو له امله بېرته له منځه تللی دی. دا لومړی ځل دی چې په یوه کال کې په دوو جلا ځایونو (غزه او د سوډان ځینې برخې) کې قحطي په رسمي ډول تایید شوې ده.
تېر کال شاوخوا ۲۶۶ میلیونه خلک د خوړو له سختې بېامنۍ سره مخ وو، چې دا د ۲۰۱۶ کال په پرتله نږدې دوه چنده زیاتوالی ښيي. راپور خبرداری ورکړی چې د منځني ختیځ جګړه د بېځایه شویو کسانو د شمېر په زیاتولو او د کیمیاوي سرې د بیو په لوړولو سره بحرانونه نور هم سختوي. د هورمز تنګي بندېدو، چې د تېلو د لېږد مهمه لاره ده، د کیمیاوي سرې بیې خورا لوړې کړې دي.
د کرنې د پراختیا لپاره د ملګرو ملتونو د نړیوال صندوق (IFAD) مشر، الوارو لاریو، وویل چې د انرژۍ او سرې د بیو لوړوالی به د محصولاتو پر تولید خورا ناوړه اغېز وکړي. هغه پر کوچنیو بزګرانو د پانګونې، د اوبو او اقلیم په وړاندې د مقاومو فصلونو د کرلو او په محلي کچه د سرې د تولید غوښتنه وکړه ترڅو دا بحران کم شي.
