د مسکو په موټر بم چاودنه کې یو لوړ پوړی روسی جنرال ووژل شو

د مسکو په موټر بم چاودنه کې یو لوړ پوړی روسی جنرال ووژل شو

ډګر جنرال فانیل سروروف، یو لوړ پوړی پوځي چارواکی، په داسې حال کې  ووژل شو چې پلټونکي د اوکراین د استخباراتو د احتمالي لاس لرلو په ګډون د ګڼو نښو پلټنه کوي.

د روسیې د پلټنو کمېټې ویلي، یو روسی جنرال د دوشنبې په سهار هغه مهال ووژل شو چې د مسکو په جنوب کې د هغه د موټر لاندې ایښودل شوې چاوديدونکي توکي وچاودیدل.

کمېټې په ټیلیګرام کې په یوه بیان کې وویل چې ډګر جنرال فانیل سروروف، د روسیې د عمومي قومندانۍ د عملیاتي روزنې د څانګې مشر، د چاودنې له امله د ټپونو په پایله کې مړ شوی دی.

په بیان کې ویل شوي: «د پلټونکو د معلوماتو له مخې، د دسمبر د ۲۲مې په سهار، د مسکو په یاسینیوایا سړک کې د یوه موټر لاندې ځای پر ځای شوې چاودیدونکي توکي وچاودید.»

په بیان کې زیاته شوې چې په مسکو کې د یوې جنایي قضیې تر پرانیستلو وروسته پلټنې روانې دي.

همدارنګه ویل شوي: «پلټونکي د دې وژنې په اړه بېلابېلې نظریې څېړي. له هغو څخه یوه دا ده چې دا جرم د اوکراین د استخباراتي ادارو له خوا تنظیم شوی وي.»

تر اوسه د اوکراین چارواکو د دې ادعا په اړه څه نه دي ویلي.