د امریکا د لوی درستیزانو د کمیټې مشر، جنرال ډان کین، ویلي چې ایران جګړه کوي او د دې لپاره د درناوي وړ دی، خو زیاته یې کړه چې ایراني ځواکونه تر هغه څه چې پخوا فکر کېده، پیاوړي نه دي.
د امریکا د دفاع وزارت په وینا، د ایران په جګړه کې شاوخوا ۱۴۰ امریکایي سرتیري ټپيان شوي، چې د ۸ تنو روغتیایي وضعیت يي نازکه دی.

د د امریکا د دفاع وزارت ویاند، شان پارنل، د سه‌شنبې په ورځ په یوه اعلامیه کې وویل: "د 'حماسي قهر عملیاتو' له پیل راهیسې، په لس ورځنیو بریدونو کې شاوخوا ۱۴۰ امریکایي عسکر ټپيان شوي دي."

پارنل زیاته کړه چې اته سخت ټپي شوي عسکر تر ټولو لوړې کچې طبي پاملرنې لاندې دي.

رویټرز خبري اژانس نه دی توانېدلی چې د ټپونو نوعیت او دا چې په دغو ټپونو کې "د مغزي ضربې صدمې" شاملې دي که نه، تشخیص کړي. دا ډول ټپونه معمولاً له چاودنو سره تر مخامخ کېدو وروسته رامنځته کیږي.

ایران د فبرورۍ له ۲۸مې، کله چې دا نښتې پیل شوې، راهیسې د امریکا پر پوځي اډو ځوابي بریدونه کوي. تر اوسه ایران د عربي خلیج په هېوادونو کې پر دیپلوماتیکو ماموریتونو، هوټلونو، هوايي ډګرونو بریدونه کړي او د تېلو زیربناوو ته یې زیان اړولی دی.

دا شمېرې وروسته له هغه د امریکايي عسکرو د پراخو تلفاتو لومړنۍ نښه ده چې په کویټ او سعودي عربستان کې د ایران په ځوابي توغندیزو او ډرون بریدونو کې اووه امریکایي عسکر ووژل شول.

د سه‌شنبې په ورځ خبریالانو ته د وینا پر مهال، د لوی درستیزانو د کمیټې مشر جنرال ډان کین د دې پوښتنې په ځواب کې چې ایا ایران تر تمې ډېر پیاوړی دښمن دی، وویل چې روانه جګړه تر هغه څه چې تمه یې کېده، سخته نه ده.

کین په پنټاګان کې په یوه خبري کنفرانس کې وویل: "زما په اند دوی جګړه کوي، او زه یې درناوی کوم، خو فکر نه کوم چې دوی تر هغه څه چې موږ یې فکر کاوه، پیاوړي دي."

د امریکا د دفاع وزیر پیټ هګسیت د سه‌شنبې په ورځ وویل چې د ایران پر خاوره به د امریکا هوايي بریدونه تر ټولو سخت پړاو ته ورسېږي؛ په داسې حال کې چې د ایران کمزوري شوي پوځي رژیم د مقاومت د دوام هوډ څرګند کړی دی.

بې‌ساري پوځي پایلې

په تهران کې اوسېدونکو ویلي چې پلازمېنه د جګړې د ځینو تر ټولو سختو هوايي بریدونو شاهده وه، زورورو چاودنو د ښار لوېدیځې سیمې ولړزولې او د برېښنا پراخه پرچاوي رامنځته شوه.

د تهران په لوېدیځ کې یوه اوسېدونکي وویل چې بریدونه د نیمې شپې په شاوخوا کې وشول او سیمه یې شاوخوا نیم ساعت ولړزوله.

د ایران د پارلمان رئیس، محمد باقر قالیباف، د اوربند هر ډول وړاندیز رد کړ، په داسې حال کې چې د ایران یوه بل جګپوړي امنیتي چارواکي، علي لاریجاني، پر X ټولنیزه شبکه لیکلي: "ایران ستاسو (ټرمپ) له تشو ګواښونو نه وېرېږي."

په ورته وخت کې، ټرمپ د سه‌شنبې په ورځ وویل که ایران د هرمز په تنګي کې کوم ماینونه ځای پر ځای کړي وي، باید سمدستي یې لرې کړي او دا به "په سم لوري یو لوی ګام" وي.

د امریکا ولسمشر ایران ته خبرداری ورکړ چې که ماینونه سمدستي پاک نه شي، نو له داسې پوځي پایلو سره به مخ شي چې مخینه به یې نه وي لیدل شوې.