د امریکا ولسمشر ډونالډ ټرمپ ویلي چې هغه باید پرېکړه وکړي چې ایا له ایران سره جګړه پراخه کړي او که کومې هوکړې ته ورسېږي. نوموړي د خپل راتلونکي اقدام له روښانولو پرته اشاره وکړه چې د پرېکړې وخت نږدې دی.
د خبریالانو د دې پوښتنې په ځواب کې چې هغه له ایراني چارواکو سره د چلند لپاره څه پلان لري، ټرمپ وویل: "ښايي یو ځل بیا له پوځي لارې څخه کار واخیستل شي او بمباري پرې وشي."
هغه وویل: "موږ باید دا پرېکړه وکړو: هغوی په بمونو والوزوو او که هوکړه ورسره وکړو." زیاته یې کړه: "خو وخت یې راروان دی. دا به ډېر ژر، په یوه یا بله بڼه پای ته ورسېږي."
ټرمپ په وروستیو اونیو کې په پرله پسې ډول ویلي چې هغه له تهران سره د هوکړې پر ځای د نورو پوځي اقداماتو پر لارو چارو غور کوي.
د امریکا ولسمشر په وروستیو ورځو کې د رسنیو هغه راپورونه رد کړي چې ګواکې هغه د ایران د اټومي پروګرام په اړه د پام وړ پرمختګ په بدل کې د اقتصادي بندیزونو کمولو او د ایران د کنګل شویو پیسو خلاصولو ته چمتو دی.
امریکايي رسنیو، اکسیوس او سياېناېن د دوشنبې په ورځ راپور ورکړ چې د منځني ختیځ د جګړې په اوږدېدو سره، د امریکا ولسمشر ایران ته د بندیزونو کمولو او د کنګل شویو پیسو د خلاصولو وړاندیز کړی دی.
ټرمپ پخپله ټولنیزه شبکه (Truth Social) کې لیکلي: "اکسیوس تازه یو راپور خپور کړی چې ګواکې 'ټرمپ' ایران ته د بندیزونو د کمولو او کنګل شویو پیسو د ورکړې وړاندیز کړی. دا دروغ دي. ما هغوی ته هېڅ نه دي وړاندیز کړي!"
د امریکا ولسمشر د اونۍ په پای کې د ایران هغه وړاندیز رد کړ چې د کړکېچونو کمولو او د هرمز ستراتیژیک تنګي د بیا پرانستلو په موخه شوی و. هغه د اووه میاشتنۍ ایرانۍ جګړې په ترڅ کې د تهران شرایط "د نه منلو وړ" وبلل.
ټرمپ د اونۍ په پای کې وویل چې له تهران سره د نورو خبرو اترو تمه لري، او ټینګار یې وکړ چې ایراني چارواکو په تېرو خبرو اترو کې له خپل دریځ څخه "ناسمه ګټه اخیستې ده"
