د افغانستان د ښځو د فوټبال د کډوالو لوبډله د فیفا په ملاتړ په یو لړ سیالیو کې خپلې لومړنۍ رسمي لوبې کوي
فیفا د چهارشنبې په ورځ وویل، چې د افغانستان د ښځو د فوټبال د کډوالو لوبغاړو ملي لوبډله به په راتلونکې میاشت کې په دوبۍ کې په یوه څلور اړخیز ټورنمنټ کې خپلې لومړنۍ رسمي لوبې ترسره کړي.
د فیفا تر ملاتړ لاندې دا لوبډله - چې لا تر اوسه په رسمي توګه د نړیوال جام په غوراوي سیالیو کې د افغانستان استازیتوب نشي کولی - به د اکتوبر له ۲۳مې تر ۲۹مې په دې سیالیو کې له کوربه متحده عربي اماراتو، چاډ او لیبیا سره مخامخ شي.
افغانستان له ۲۰۱۸ کال راهیسې د ښځو کومه رسمي سیالي نه ده کړې، او په ۲۰۲۱ کال کې واک ته د طالبانو په بیا راتګ سره د ښځو ورزش ودرول شو. د افغانستان د فوټبال فدراسیون د فیفا د قوانینو له مخې مکلفیت لري چې له تبعیض څخه ډډه وکړي، خو له نړیوال فوټبال څخه یې غړیتوب نه دی ځنډول شوی.
د فوټبال دغه بنسټ ویلي، "دا ټورنمنټ د فیفا هغه هڅې پیاوړې کوي چې د ټولو ښځو او نجونو د ورزش کولو د حق ملاتړ او ساتنه وکړي، خپل فوتبالي خوبونه تعقیب کړي او د دې لوبې له لارې وده وکړي."
د چاډ او لیبیا د ښځو لوبډلې لا تر اوسه د فیفا په درجه بندۍ کې ځای نه لري، او متحده عربي امارات په ۱۱۷م مقام کې ده.
فیفا ویلي چې د دې پړاویز ټورنمنټ ټولې لوبې به د دوی پر خپل داخلي سټریمینګ پلیټفارم په ژوندۍ بڼه خپرې شي.
