وال سټریټ ژورنال د سه شنبې په ورځ د هغو کسانو په حواله چې له دې خبرو اترو خبر دي، راپور ورکړی چې امریکا یو شمیر عربي خلیجي هیوادونو ته ویلي چې د نوامبر د ۳مې نیټې له منځمهاله ټاکنو وروسته د ایران پر وړاندې "لنډو او سختو پوځي عملیاتو" ته ځانونه چمتو کړي.
د راپور له مخې، دا پیغامونه چې د ډیپلوماتیکو او پوځي چینلونو له لارې لیږدول شوي، د هغو مخ پر زیاتیدونکو نښو څخه دي چې ښیي امریکا او اسرائیل د ایران د کمزوري کولو او خبرو اترو ته د اړ کولو لپاره د درنو جنګي عملیاتو نوي پړاو ته چمتووالی نیسي.
ورځپاڼې د چارواکو په حواله ویلي چې د امریکا پوځ د پیټریوټ توغندیو دفاعي سیسټم له ټیکساس څخه سیمې ته لیږدوي او خپل سرتیري یې له هغو اډو څخه ایستلي چې زیان منونکي وو، په داسې حال کې چې امریکایي ځواکونه خپل مهمات بیرته اکمالوي او بم غورځونکې او جنګي الوتکې د بریدونو لپاره چمتو کوي.
راپور زیاتوي چې تمه کیږي راتلونکې میاشت د الوتکو وړونکې یوه بله ضربتي ډله او د سمندري ځواکونو یو کشفي واحد په منځني ختیځ کې له شاوخوا شل امریکایي جنګي کښتیو سره یوځای شي.
د راپور له مخې او د هغو کسانو په حواله چې د ولسمشر ډونالډ ټرمپ له افکارو خبر دي، هغه تراوسه وروستۍ پریکړه نه ده کړې، خو د 'ټاکنو وروسته د یوه لوی برید' تمایل لري چې کولی شي د ایران زیربناوې او اټومي تاسیسات په نښه کړي.
سپینې ماڼۍ د هغو "حساسو پوځي پلانونو په اړه چې ممکن شتون ولري یا یې ونه لري" له تبصرې کولو څخه ډډه وکړه.
سپینې ماڼۍ وویل: "ولسمشر ټرمپ ټول انتخابونه پر میز ایښي ترڅو ډاډ ترلاسه کړي چې ایران به هیڅکله اټومي وسله ونه لري."
ټرمپ د سه شنبې په ورځ په ټیکساس کې د لوبوک په ښار کې د یوې ټاکنیزې غونډې پر مهال وویل: "که مو خوښه وي، تاسو به په څو اونیو کې ایران وګورئ."
هغه وویل: "موږ د 'نیمې شپې څټک' او 'حماسي غوسې' عملیاتو په واسطه د ایران د اټومي غني کولو وړتیا له منځه یوړه او دوی ته مو له پوځي، مالي او نورو اړخونو ماتې ورکړه. او دا ټول به ډیر ژر پای ته ورسیږي."
هغه زیاته کړه: "دا هرکله پای ته رسیدلی شي، کله چې زه وغواړم چې پای ته ورسیږي."
ټرمپ تر دې مخکې ویلي وو چې تر منځمهاله ټاکنو وړاندې به پر ایران برید ونکړي.
امریکا او اسرائیلو د فبرورۍ په ۲۸مه د ایران پر ضد جګړه پیل کړه، چې له امله یې تهران په سیمه کې د توغندیو او بې پیلوټه الوتکو په بریدونو ځواب ورکړ او په اغیزمنه توګه یې د هرمز تنګی، چې د نړیوالې انرژۍ د اکمالاتو یوه کلیدي لاره ده، وتاړه.
په جون میاشت کې د وروستۍ سولې تړون ته د لارې هوارولو په موخه د تفاهم یو یادښت لاسلیک شو، خو د تنګي د تګ راتګ په ګډون د اختلافاتو له امله له منځه لاړ.
