د جرمني لومړي وزیر د مونیخ امنیتي کنفرانس ته وویل چې اروپا باید د نړیوالو ستونزو د حل لپاره له کلیدي هېوادونو سره نړیوالې ملګرتیاوې پراخې کړي.
د جرمني لومړي وزیر فریدریش مېرز وویل، اروپايي ټولنه باید د نړیوالو ننګونو د هوارولو لپاره له تورکیې، هند او برازیل په څېر هېوادونو سره ملګرتیاوې پیاوړې کړي.
مېرز د جمعې په ورځ د مونیخ امنیتي کنفرانس کې د وینا پر مهال وویل، که څه هم د اروپايي ټولنې د غړو ترمنځ نږدې ادغام او له امریکا سره اړیکې مهمې دي، خو دا نور د نن ورځې د اقتصادي او امنیتي ننګونو د حل لپاره کافي نه دي.
مېرز وویل:
"موږ اړتیا لرو چې د نړیوالو ملګرتیاوو یوه قوي شبکه رامنځته کړو. کاناډا، جاپان، تورکیه، هند او برازیل به په دې کې کلیدي رول ولوبوي، لکه څنګه چې سویلي افریقا، د خلیج هېوادونه او نور به یې لوبوي."
د جرمني محافظه کار مشر ټینګار وکړ چې اروپايي ټولنه باید له دې هېوادونو سره د متقابل احترام او اوږدمهاله لیدلوري پر بنسټ خپله همکاري پیاوړې کړي. هغه زیاته کړه چې دا کار به د نورو هېوادونو پورې د تړاو (احتیاج) مخه ونیسي او دواړو خواوو ته به نوي فرصتونه رامنځته کړي.
د اوکراین جګړه
مېرز همدارنګه وویل چې دی چمتو دی له روسي مشرانو سره خبرې وکړي، خو ټینګار یې وکړ چې روسیه لا تر اوسه له اوکراین سره د سولې د "جدي" خبرو لپاره چمتو نه ده.
هغه زیاته کړه:
"دا جګړه به یوازې هغه وخت پای ته ورسېږي کله چې روسیه لږترلږه له اقتصادي او احتمالي پلوه له نظامي اړخه ستومانه شي. موږ دغه وخت ته نږدې کېږو، خو لا نه یو ورسېدلي."
مېرز وویل، موږ باید هر هغه څه وکړو چې روسیه دې پایلې ته ورسېږي چې د دې ناوړه جګړې دوام نور د دوی په ګټه نه دی.
