د امنیت شورا دوه دایمي غړیو روسیې او چین او د ملګروملتونو مشر ګوتریش پر ایران د امریکا بریدونه وغندل.
د ملګرو ملتونو عمومي منشي انتونیو ګوتریش د ایران د اټومي پروګرام په اړه د جګړې د سمدستي پای ته رسېدو او جدي مذاکراتو د بیا پیل غوښتنه کړې ده، وروسته له هغې چې امریکا متحده ایالتونو د اسرائیلو سره یو ځای د ایران په درې اټومي تاسیساتو بریدونه وکړل.
ګوتریش د یکشنبې په ورځ د ملګرو ملتونو د امنیت شورا په یوه بیړنۍ غونډه کې وویل: "موږ اوس د غچ اخیستنې په یوه خطرناک حالت کې یو، چې یو بل پسې روان دی." هغه زیاته کړه: "موږ باید سمدستي او په پریکنده ډول عمل وکړو ترڅو جګړه ودروو او جدي او دوامداره مذاکراتو ته راستون شو."
د ملګرو ملتونو مشر خبرداری ورکړ چې د منځني ختیځ خلک "نور د ویجاړتیا یو بل دور نه شي زغملای" او ایران ته یې یادونه وکړه چې د اټومي وسلو د نه خپرېدو تړون سره بشپړه همکاري وکړي.
د اټومي انرژۍ نړیوالې ادارې مشر: د خبرو اترو لپاره وخت کمېږي
د اټومي انرژۍ نړیوالې ادارې عمومي مشر رافایل ګروسي خبرداری ورکړ چې بریدونو د اټومي خوندیتوب او امنیت په برخه کې "شدید زیان" اړولی، که څه هم د وړانګو د خپرېدو کومه فوري پېښه نه ده رامنځته شوې.
ګروسي وویل چې د نطنز تاسیساتو ته "لوی زیان" رسېدلی، چې پکې د بریښنا مهمې زېربناوې او د یورانیم موادو زیرمه لرونکي ځمکني هالونه شامل دي. هغه د کیمیاوي ککړتیا د امکان په اړه خبرداری ورکړ او ویې ویل چې د خبرو اترو لپاره فرصت مخ په کمېدو دی.
د ملګرو ملتونو لپاره د ایران سفیر، امیر سعید اېرواني، د امریکا هوايي بریدونه د واشنګټن په سیاسي تاریخ کې "بله تور داغ" وباله او د اسرائیلو لومړي وزیر بنیامین نتنیاهو یې تورن کړ چې امریکا یې "یو بل بې اساسه جګړې" ته کش کړی دی.
ایرواني د امنیت شورا په غونډه کې وویل: "یو ځل بیا، د نړیوالو لخوا مطلوب جنګي مجرم نتنیاهو په دې بریالی شو چې د امریکا بهرنۍ پالیسي برمته کړي."
روسیه او چین لخوا د امریکا او اسراییلو بریدونو غندنه
د روسیې د ملګرو ملتونو استازي، واسلي نبنزیا، دغه هوايي بریدونه په سختو ټکو وغندل او دا یې د "ملګرو ملتونو د یو خپلواک غړي پر وړاندې د امریکا لخوا غیرمسؤلانه، خطرناک او پاروونکي عملونه" وبلل.
هغه خبرداری ورکړ چې امریکا "د پانډورا صندوق پرانیست" او زیاته یې کړه: "هیڅوک نه پوهېږي چې دا به کومې نوې فاجعې او کړاوونه رامنځته کړي."
د چین استازي، فو کانګ، هم ورته نیوکه وکړه او ویې ویل چې د امریکا کړنې "د ملګرو ملتونو د منشور او نړیوال قانون موخې او اصول په جدي ډول تر پښو لاندې کوي."
بریتانیا او امریکا د بریدونو دفاع کوي
د ملګرو ملتونو لپاره د بریتانیا سفیرې، باربرا ووډوارډ، وویل چې بریتانیا په بریدونو کې برخه نه درلوده، خو ټینګار یې وکړ چې "ایران باید اټومي وسله ونه لري" او د تهران پروګرام یې "د نړیوالې سولې او امنیت لپاره جدي ګواښ" وباله.
د امریکا د چارو سرپرستې ډوروتي شی وویل چې بریدونه د ایران د اټومي غني کولو وړتیا د له منځه وړلو لپاره ترسره شوي دي.
"اوس وخت راغلی چې امریکا د خپل متحد، خپلو اتباعو او ګټو د دفاع لپاره په پریکنده ډول عمل وکړي،" هغې وویل او تهران یې د هر ډول غچ اخیستنې پر وړاندې خبرداری ورکړ.
