اروپايي ټولنې د اټومي پروګرام پر سر د ملګرو ملتونو له اقدام وروسته پر ایران بیا بندیزونه ولګول

اروپايي ټولنې د اټومي پروګرام پر سر د ملګرو ملتونو له اقدام وروسته پر ایران د بندیزونو بیا لګول تایید کړل

د بندیزونو له بیا لګولو سره سره، لویدیځو مشرانو ټینګار کړی چې د خبرو اترو لارې پرانیستې دي.

اروپايي ټولنې تایید کړې چې د ایران د اټومي پروګرام پر سر یې پر دغه هېواد پراخ بندیزونه بېرته لګولي، وروسته له هغه چې ملګرو ملتونو خپل پراخ اقدامات بیا پلي کړل.

ملګرو ملتونو دا ګام د اوونۍ په پای کې وروسته له هغه پورته کړ، چې لویدیځو قدرتونو د ۲۰۱۵ کال د اټومي تړون له مخې د "سنیپ بیک" په نوم میکانیزم فعال کړ.

په هغو بندیزونو کې چې د دې ۲۷ هېوادونو د ټولنې له خوا بېرته لګول شوي، د ملګرو ملتونو هغه اقدامات شامل دي چې د تهران له اټومي او بالستیک توغندیو فعالیتونو سره راکړه ورکړه منع کوي.

خو دا بندیزونه تر دې هم پراخ دي او مالي اقدامات هم پکې شامل دي، د بېلګې په توګه د ایران د مرکزي بانک د شتمنیو کنګل کول.

تهران د ملګرو ملتونو د بندیزونو بیا پلي کول "غیر عادلانه" بللي او غندلي یې دي.

د بندیزونو له بیا لګولو سره سره، لویدیځو مشرانو ټینګار کړی چې د خبرو اترو لارې پرانیستې دي.

اړوند
د اټومي خبرو له ناکامۍ وروسته پر ایران د ملګرو ملتونو پراخ بندیزونه بیا ولګول شول

"دا د دیپلوماسۍ پای نه دی"

د اروپايي ټولنې لوړپوړې دیپلوماتې، کایا کالاس، د یکشنبې په ورځ وویل چې د بندیزونو بیا لګول "باید د دیپلوماسۍ پای نه وي."

ایران د اټومي وسلو د ترلاسه کولو هڅې ردوي او ژمنه یې کړې چې د اټومي وسلو د نه خپرولو په تړون کې به پاتې شي.

خو دغه هېواد د شنبې په ورځ له لندن، پاریس او برلین څخه خپل سفیران د مشورو لپاره راوغوښتل او لویدیځو هېوادونو ته یې د "جدي پایلو" خبرداری ورکړ.

روسیې او چین د ملګرو ملتونو په امنیت شورا کې ناکامه هڅه وکړه چې د بندیزونو "سنیپ بیک" وځنډوي، او خبرداری یې ورکړ چې دا کار په منځني ختیځ کې کړکېچ زیاتولی شي. د دوی د پرېکړه لیک مسودې د شورا د ۱۵ غړو له منځه یوازې څلور رایې ترلاسه کړې.