سرپرستې ولسمشرې ډلسي روډریګز وویل، د هغو دوو زورورو زلزلو له امله چې وینزویلا یې لړزولې، لږترلږه ۳۲ کسان وژل شوي او تر ۷۰۰ ډېر نور ټپیان دي. روډریګز د پنجشنبې په ورځ ملت ته په خپله وینا کې وویل: "تر دې دمه موږ ته د ۳۲ مړینو او تر ۷۰۰ د ډېرو ټپیانو راپورونه رارسېدلي دي." هغې زیاته کړه چې لا یې د "لا ګوایرا" سیمې په اړه چې پلازمېنې ته نږدې ده او سخت زیان ورته رسېدلی، بشپړ معلومات نه دي ترلاسه کړي.

نوموړې د چهارشنبې په وروستیو کې وروسته له هغه ملي بېړنی حالت اعلان کړ چې د هیواد په شمالي کارابین ساحل کې یو لړ زورورې زلزلې وشوې، چې پراخ زیانونه یې واړول او په سیمه کې یې د سونامي خبرداریو ته لاره هواره کړه.

په ورته وخت کې، د امریکا ولسمشر ډونالډ ټرمپ د چهارشنبې په ورځ وویل چې دغو دوو زلزلو "ویروونکې مرګ ژوبله" اړولې ده، خو د مړو رسمي شمېره یې یادونه ونه کړه. ټرمپ په "ټروت سوشل" کې ولیکل: "هغه دوه لویې زلزلې چې د وینزویلا پر سترو خلکو وشوې، په پیمانه کې خورا پراخې دي او ویروونکې مرګ ژوبله یې اړولې ده. امریکا مرستې ته چمتو، لېواله او باصلاحیته ده!"

اصلي ټکانونه او زیانونه:
د انټرنیټ څارونکې ډلې راپور ورکړی چې په وینزویلا او پلازمېنه کاراکاس کې انټرنیټي خدمات په لویه کچه پرې شوي، ځکه زلزلې بریښنا او مخابراتي تاسیساتو ته زیان رسولی دی.

د امریکا د جیولوژیکي سروې ادارې (USGS) د تخنیکي معلوماتو له مخې، د وینزویلا شمالي برخه د دوو غیرعادي پرله پسې زلزلو لخوا ولړزول شوه. لومړی د ۷.۲ درجې زلزله (foreshock) وشوه او یوازې ۴۰ ثانیې وروسته، د ۷.۵ درجې یو بل خورا ویجاړونکی اصلي ټکان (mainshock) رامنځته شو. دا په تېرو ۱۲۵ کلونو کې په وینزویلا کې تر ټولو قوي ثبت شوې زلزله وه.

دې زلزلو په پلازمېنه کاراکاس کې څو ودانۍ ونړولې. ډلسي روډریګز دا هم تایید کړه چې په مایکیټیا کې د "سیمون بولیوار نړیوال هوایی ډګر" د ترمینلونو او ځغاستلیکو (رن ویز) د سختو زیانونو له امله د نامعلوم وخت لپاره تړل شوی دی. په ټولنیزو رسنیو کې خپاره شوي ویډیوګانې ښيي چې په پلازمېنه کې له ودانیو څخه د دوړو غبارونه پورته کېږي.

'د اندېښنې وړ وضعیت':
د وینزویلا د کورنیو چارو وزیر ډیوسډاډو کابیلو ځايي رسنیو ته وویل چې د زلزلې سختو ټکانونو د ودانیو او کورونو د نړېدو لامل شوي دي. هغه په کاراکاس کې د "الټامیرا" په سیمه کې وضعیت "د اندېښنې وړ" وباله، چیرې چې څو پوړیزې استوګنیزې ودانۍ په جزوي ډول نړېدلي دي. کابیلو له خلکو وغوښتل چې د احتمالي نورو ټکانونو (aftershocks) له امله له ودانیو بهر او په کوڅو کې پاتې شي.

روډریګز له ملګرو ملتونو او د ترکیې، برازیل، مکسیکو، اردن، بارباډوس، کوراکاو، کولمبیا او برتانیا له حکومتونو څخه مننه وکړه چې د پیوستون پیغامونه یې لیږلي او د مرستې وړاندیز یې کړی دی. د برازیل ولسمشر لولا دا سیلوا هم په خپله ایکس پاڼه کې د وینزویلا له خلکو سره خپله خواخوږي او مرستې ته چمتووالی څرګند کړ.

د "بحرالکاهل د سونامي خبرداري مرکز" د وینزویلا د ساحلونو او ګاونډیو ټاپوګانو لکه اروبا، بونیر او کوراکاو لپاره د سونامي خطر اعلان کړی دی. همداراز د پورټو ریکو او د امریکا د ورجن ټاپوګانو لپاره هم مشورتي خبرداری فعال شوی دی.