امریکا په کویټ کې د بې پیلوټه الوتکې په برید کې د وژل شویو دوو نورو سرتېرو هویت څرګند کړ
په کویټ کې د امریکا پر یوه لوجستیکي مرکز د ایران د بې پیلوټه الوتکې په برید کې شپږ امریکايي سرتېري ووژل شول او ۱۸ نور ټپیان شول.
د امریکا د دفاع وزارت (پنټاګون) د چهارشنبې په ورځ د ایران پر وړاندې په جګړه کې د وژل شویو دوو نورو امریکايي سرتېرو هویت څرګند کړ.
د اردو دغه احتیاطي سرتېري د یکشنبې په ورځ هغه مهال ووژل شول چې یوې بې پیلوټه الوتکې د کویټ په "شعیبه بندر" کې د امریکا پر یوه پوځي تاسیساتو برید وکړ؛ په دې برید کې څلور نور احتیاطي سرتېري هم وژل شوي وو.
د امریکا د دفاع وزارت ویلي چې ۴۵ کلن جیفري آر اوبراین د ایوا ایالت اوسیدونکی او ۵۴ کلن رابرټ ایم مرزان د کلیفورنیا ایالت اوسیدونکی، د هغو شپږو امریکایي سرتېرو په ډله کې وو چې د شنبې په ورځ په شعیبه بندر کې د ایران د یوې ډرون الوتکې په برید کې ووژل شول.
پنټاګون وویل، داسې انګیرل کیږي چې مرزان د برید په ځای کې مړ شوی وي، او زیاته یې کړه چې د هویت وروستۍ تایید به (عدلي طب) له خوا بشپړ شي.
پنټاګون تر دې وړاندې د څلورو نورو قربانیانو نومونه داسې اعلان کړي وو: کوډي ای خورک (۳۵ کلن)، نوح ایل ټیټینز (۴۲ کلن)، نیکول ایم امور (۳۹ کلنه) او ډیکلان جې کوډي (۲۰ کلن).
د شعیبه بندر چې په کویټ کې یو سوداګریز بندر دی، د امریکايي پوځ لپاره د یو مهم لوجستیکي مرکز په توګه هم کارول کیږي، چې په سیمه کې د تکتیکي وسایطو او اکمالاتو د لېږد لپاره ترې ګټه اخیستل کیږي.
پر وژل شویو کسانو سربېره، په دغه برید کې ۱۸ نور سرتېري ټپیان شوي دي.
د بې پیلوټه الوتکې دا برید د شنبې په ورځ پر ایران د امریکا او اسرائیل له هغو ګډو بریدونو لږ وروسته وشو چې پکې د ایران د ستر مذهبي مشر علي خامنه اي په ګډون د دغه هېواد څو جګپوړي چارواکي ووژل شول.
ایران له هغه وخت راهیسې د خلیج په هېوادونو او په سیمه کې د امریکا پر پوځي اهدافو د غچ اخیستونکو بریدونو سره ځواب ورکړی دی.
