د تورکیې د احصایې ادارې د روان کال د لومړۍ ربعې (د جنوري - مارچ موده) په اړه د کورني ناخالص تولید پایلې اعلان کړې.
د دې شمېرو له مخې، د ۲۰۲۶ کال د لومړۍ ربعې د کورني ناخالص تولید لومړنی اټکل، د ځنځیري حجم د شاخص په توګه د تېر کال د همدې ربعې په پرتله ۲.۵ سلنه زیات شوی دی. په دې سره د تورکیې اقتصاد په پرله پسې ډول ۲۳ ربعې وده وکړه.
د تولید د میتود له مخې په روانو بیو د کورني ناخالص تولید اټکل، د کال په لومړۍ ربع کې د تېر کال د همدې مودې په پرتله ۳۵.۷ سلنه زیات شوی او ۱۶ ټریلیونه ۹۹۹ میلیارده ۹۷۷ میلیونه لیرو ته رسېدلی دی. د ډالرو په حساب، د لومړۍ ربعې د کورني ناخالص تولید ارزښت ۳۸۹ میلیارده ۵۹۸ میلیونه ډالره اټکل شوی.
د ۲۰۲۶ په لومړۍ ربع کې د سکتورونو پر بنسټ وده:
کله چې د کورني ناخالص تولید جوړونکي فعالیتونه وڅېړل شي، د تېر کال په پرتله په لومړۍ ربع کې په لاندې سکتورونو کې زیاتوالی راغلی:
معلومات او مخابرات: ۹.۵ سلنه
نور خدمتونه: ۵.۲ سلنه
کرنه: ۴.۶ سلنه
سوداګري، ټرانسپورټ، هوټلداري او د خوړو خدمتونه: ۳.۷ سلنه
مالي او بیمې چارې: ۳.۵ سلنه
ودانیز سکتور (ساختمان): ۳.۲ سلنه
د املاکو فعالیتونه: ۳ سلنه
مسلکي، اداري او ملاتړي خدمتونه: ۱.۹ سلنه
عامه اداره، ښوونه او روزنه، روغتیا او ټولنیز خدمتونه: ۱.۸ سلنه
خو د صنعت سکتور بیا ۰.۸ سلنه کموالی ښودلی دی.
د ودې د توقعاتو په سروې کې برخه اخیستونکو اقتصاد پوهانو اټکل کړی و چې د تورکیې اقتصاد به په لومړۍ ربع کې ۲.۷ سلنه وده وکړي. همدارنګه د ۲۰۲۶ کال د ټول کال لپاره د اقتصاد پوهانو د ودې اوسط توقع ۳.۳ سلنه وه.
