په برلین کې له سلو زرو ډېرو خلکو په غزه کې د اسرائیلو لخوا د روانې نسل وژنې نه د جرمني د ملاتړ له امله د جرمني پر ضد لاریون وکړ.

د راپورونو له مخې، وروسته له هغه چې د فلسطین پلوه سازمانونو، میډیکو انټرنېشنل (Medico International) او د بخښنې نړیوال سازمان (Amnesty International) په ګډون شاوخوا ۵۰ ډلو په یوه پراخ ائتلاف کې د اسرائیلو پر اړه د جرمني د حکومت د پالیسو پر خلاف د  لاریون غوښتنه وکړه  ،  تر سلو زرو تنو ډیرو لاریون کوونکو د شنبې په ورځ د برلین له ښاروالۍ څخه تر ګروسر سټرن (Grosser Stern) پورې لاریون وکړ.

د "ټولې سترګې غزې ته - نسل وژنه ودروئ" په نوم د دې ستر لاریون تنظیموونکو د فلسطین په خاوره کې د اسرائیلو په نسل وژونکې جګړه کې "د جرمني څخه پدې جرم کې خپل شراکت پایته ورسوۍ" غوښتنه وکړه.

هغوی همدارنګه "له اسرائیلو سره د ټولو پوځي همکاریو د پای ته رسولو غوښتنه وکړه. په دې کې د وسلو، مهماتو او نورو پوځي تجهیزاتو واردات، صادرات او ترانزیټ شامل دي."

تنظیموونکو په یوه اعلامیه کې وویل: "د اسرائیلو د حکومت کړنې له ډېرې مودې راهیسې د کارپوهانو او نړیوالو سازمانونو له خوا د نسل وژنې په توګه تعریف شوي دي، او د عدالت نړیواله محکمه هم په دې اړه څېړنې کوي. په داسې حال کې چې هرڅوک ویني چې اسرائیلي پوځ په غزه کې څه ډول  ډله ییز ظلمونه کوي، د جرمني حکومت دا سیستماتیک تاوتریخوالی ردوي."

لاریون کوونکو د "ازاد، ازاد فلسطین" او "ژوندی دې وي فلسطین" شعارونه ورکول او داسې شعارپاڼې یې پورته کړې وې چې پرې لیکل شوي وو: "په غزه کې نسل وژنه ودروئ"، "بیا هېڅکله د ټولو لپاره" او "فلسطین ته ازادي". ډېرو لاریون کوونکو د فلسطین بیرغونه هم رپول.

هغوی اسرائیلو ته د جرمني د وسلو د صادراتو د سمدستي بندیدو، غزې ته د بشري مرستو د لاسرسي او پر اسرائیلو د اروپايي ټولنې د بندیزونو لګولو غوښتنه وکړه.

کیڼ اړخي ګوند (Left Party) مشرې اینس شویرډټنر (Ines Schwerdtner) خلکو ته په وینا کې په غزه کې د نسل وژنې او پدې جرم کې د جرمني د حکومت د شراکت اړه خبرې وکړې.

هغې وویل: "لومړی وزیر (فریډریک میرز) او وزیران خبرې کوي، خو عمل نه کوي. دوی د 'دولت د دلایلو' خبرې کوي، په داسې حال کې چې روغتونونه په کنډوالو بدلېږي. دوی د نسل وژنې په اړه چوپ دي — او په دې جرم کې شریک دي."

د سې شنبې په ورځ یوې نوې خپرې شوې سروې وښودله چې ۶۲ سلنه جرمني رایه ورکوونکي په دې باور دي چې په غزه کې د اسرائیلو کړنې نسل وژنه ده، چې دا موضوع د مرکز-ښي اړخي حکومت باندې فشار زیاتوي ترڅو د اسرائیلو په اړه خپل دریځ له سره وارزوي.

د یوګوف (YouGov) له خوا ترسره شوې دې نظرپوښتنې وښودله چې دا احساسات له سیاسي کرښو پورته دي، او د میرز د محافظه کار CDU/CSU بلاک ۶۰ سلنه رایه ورکوونکي د اسرائیلو عام وژنه د فلسطینیانو پر وړاندې نسل وژنه ګڼي.

د ائتلافي شریک سوسیال ډیموکرات ګوند (SPD) د رایه ورکوونکو په منځ کې دا شمېره نوره هم لوړه، یعنې ۷۱ سلنه وه.

که څه هم لومړي وزیر میرز او د بهرنیو چارو وزیر یوهان واډیپول په دې وروستیو کې په غزه کې د اسرائیلو پر عام وژنې او د بشري مرستو پر بندیز باندې خپله نیوکه تېزه کړې ده، خو تر اوسه یې د "نسل وژنې" اصطلاح له کارولو ډډه کړې ده او پر ځای یې د اسرائیلي پوځ له خوا د ځواک "غیر متناسب" کارولو ته اشاره کوي.

اسرائیلو په غزه کې نږدې ۶۶،۰۰۰ فلسطینیان وژلي، چې ډېری یې ښځې او ماشومان دي.

دې هېواد د دې سیمې ډېره برخه په کنډوالو بدله کړې او په عملي توګه یې ټول اوسېدونکي بې ځایه کړي دي.