کرملین ویلي دي چې روسیه به د اوکراین وروستیو بریدونو ته هغه وخت ځواب ورکړي کله چې یې پوځ مناسب وګڼي، او کیف یې د دولتي ترهګرۍ په ترسره کولو تورن کړی دی.
همدارنګه، کرملین تایید کړې چې ولسمشر ولادیمیر پوتین د امریکا ولسمشر ډونالډ ټرمپ ته ویلي چې مسکو اړ دی ځوابي اقدام وکړي.
اوکراین د تېرې اونۍ په پای کې په سایبریا او د روسیې په شمال کې د درنو بمبار کوونکو الوتکو پر هوایي اډو د ډرون بریدونه ترسره کړل. روسیې همدارنګه اوکراین تورن کړی چې د هیواد په جنوب کې یې د اورګاډي پُلونه الوزولي، چې په پایله کې یې اووه کسان وژل شوي دي.
د کرملین ویاند دیمیتري پیسکوف د پنجشنبې په ورځ د خبریالانو سره په ورځنۍ ناسته کې د ولسمشر پوتین هغه څرګندونې یادې کړې چې د اورګاډي د بریدونو په اړه یې یوه ورځ مخکې کړې وې.
پیسکوف وویل: "ولسمشر د کیف رژیم د ترهګر رژیم په توګه یاد کړ، ځکه چې د دې رژیم مشرتابه په شعوري ډول د مسافر وړونکي اورګاډي د الوزولو امر ورکړی و. دا پرته له دولتي ترهګرۍ بل څه نه دي. دا د ولسمشر له خوا یوه مهمه څرګندونه ده."
تر اوسه روسیې داسې شواهد نه دي وړاندې کړي چې د اوکراین مشران دې د اورګاډي د بریدونو امر کړی وي، او کیف هم د دې بریدونو مسؤلیت نه دی منلی.
د اوکراین له خوا په روسیه کې بریدونه او د روسیې هوایي بریدونه او د جګړې په ډګر کې پرمختګونو هغه جګړه نوره هم شدیده کړې چې د ۲۰۲۲ کال په فبروري پیل شوې ده. دا وضعیت د سولې خبرو اترو لپاره فرصتونه زیانمن کړي، چې دواړو خواوو تېر میاشت په تورکیه کې بیا پیل کړي وو.
پیسکوف وویل چې ولسمشر پوتین د چهارشنبې په ورځ د بهرنیو چارو وزیر سرګي لاوروف نظر تایید کړ چې د اوکراین سره د کاري کچې اړیکې باید دوام ومومي.
پیسکوف زیاته کړه چې پوتین او ټرمپ د چهارشنبې په ورځ د خبرو پر مهال د مخامخ لیدنې په اړه خبرې نه دي کړي. هغه وویل چې د دې لیدنې اړتیا په عمومي ډول درک شوې، خو باید په سمه توګه چمتو شي.
پیسکوف د یوې پوښتنې په ځواب کې وویل چې دواړو د روسیې پر وړاندې د بندیزونو د لرې کولو په اړه خبرې نه دي کړي.
ولسمشر ولادیمیر پوتین همدارنګه د امریکا ولسمشر ډونالډ ټرمپ ته ویلي چې روسیه چمتو ده له ایران سره د خپلو نږدې اړیکو څخه د دې هیواد د اټومي پروګرام په اړه د خبرو اترو په برخه کې مرسته وکړي.
ټرمپ د چهارشنبې په ورځ له پوتین سره د ټیلیفوني خبرو وروسته وویل چې د ایران لپاره وخت په تېریدو دی چې د خپل اټومي پروګرام په اړه پرېکړه وکړي، او هغه باور لري چې پوتین هم موافق دی چې ایران باید اټومي وسلې ونه لري.
د ټرمپ په وینا، پوتین وړاندیز وکړ چې هغه په دې خبرو کې برخه واخلي او ښایي د دې موضوع د ژر حل کولو په برخه کې مرسته وکړي، که څه هم ایران په دې برخه کې ځنډ کوي.
د کرملین ویاند دیمیتري پیسکوف خبریالانو ته وویل: "موږ له تهران سره نږدې شریکې اړیکې لرو، او طبیعي ده چې ولسمشر پوتین وویل موږ چمتو یو چې له تهران سره د دې اړیکو له کچې څخه ګټه واخلو ترڅو د ایران د اټومي دوسیې د حل لپاره د روانو خبرو اترو ملاتړ وکړو او مرسته وکړو."
کله چې له پیسکوف څخه وپوښتل شول چې پوتین به کله په دې خبرو کې ګډون وکړي، هغه وویل چې له تهران او واشنګټن سره خبرې د مختلفو چینلونو له لارې دوام لري.
پیسکوف زیاته کړه: "ولسمشر به هغه وخت په دې خبرو کې ګډون وکړي کله چې اړتیا وي."
