په داسې حال کې چې اوکراین ولسمشر زیلینسکي له متحدینو څخه د اوکراین د دفاع د پیاوړتیا لپاره د اضافي 'پیټریوټ' هوايي دفاعي سیسټمونو د چمتو کولو غوښتنه کړې د اوکراین پلازمینه کییف، کریوي ریه او لووف ښارونه یو ځل بیا د بریدونو هدف ګرځېدلي دي.
تېره شپه پر کییف، لووف او د اوکراین پر مرکزي برخو سخت بریدونه شوي دي. د روسیې دغو توغندیزو بریدونو په 'کریوي ریه' کې د ماشومانو په ګډون د شپږو کسانو ژوند اخیستی او په ټول اوکراین کې یې په لسګونو نور کسان ټپیان کړي دي.
د ځايي چارواکو په وینا، په کریوي ریه کې د روسیې په یو توغندیز برید کې د ماشومانو په ګډون شپږ تنه وژل شوي او اته نور ټپیان دي.
په لووف کې د دغه ښار ښاروال تایید کړې چې د روسیې په هوايي بریدونو کې شپږ تنه ټپیان شوي دي.
وروسته له هغه چې روسي ځواکونو غیر استوګنیز هدفونه په بالیسټیک توغندیو وویشتل، په پلازمېنه کییف کې هم د څو چاودنو غږونه واورېدل شول. د کییف ښاروال 'ویتالي کلیچکو' ویلي چې روسیې پلازمېنه په بالیسټیک وسلو په نښه کړې، چې له امله یې په ځینو غیر استوګنیزو تاسیساتو کې اور لګېدلی دی. نوموړي له اوسېدونکو وغوښتل چې پناه ځایونو ته لاړ شي.
د چهارشنبې شپې ناوخته، زیلینسکي خبرداری ورکړ چې روسیه یو لوی برید ته چمتووالی نیسي. هغه وویل: "روسانو څو ورځې وړاندې د یو لوی برید چمتووالی نیولی و او احتمال شته چې دا برید نن شپه ترسره شي. هیله ده د اوکراین په ټولو سیمو کې د هوايي بریدونو خبرداریو ته پام وکړئ او خوندي پاتې شئ."
د هوايي دفاعي توغندیو غوښتنه
زیلینسکي همداراز یو ځل بیا له خپلو متحدینو وغوښتل چې د اوکراین د هوايي دفاعي سیسټمونو لپاره اضافي توغندي ورکړي.
نوموړي وویل چې د سې شنبې په ورځ یې په سپینه ماڼۍ کې د امریکا له ولسمشر ډونالډ ټرمپ سره د لیدنې پر مهال د اوکراین د هوايي دفاع پر اړتیاوو خبرې کړي دي. په دې خبرو کې دا احتمال هم څېړل شوی چې اوکراین وکولای شي د جواز (لایسنس) په ترلاسه کولو سره په خپله د 'پیټریوټ' دفاعي توغندي تولید کړي.
د جولای میاشتې په پیل کې، ټرمپ په داسې حال کې چې روسیې خپل بالیسټیک بریدونه زیات کړي وو، له دې ملاتړ څرګند کړی و چې اوکراین ته اجازه ورکړل شي ترڅو له ځمکې څخه هوا ته ویشتونکي توغندي تولید کړي.
د زیلینسکي په وینا، یوازې امریکايي 'پیټریوټ' سیسټمونه د روسیې د بالیسټیک توغندیو د مخنیوي وړتیا لري؛ خو اوکراین اوس مهال د PAC-3 دفاعي توغندیو له جدي کمښت سره مخ دی. د اوکراین ولسمشر وویل چې د فبروري په میاشت کې د ایران پر وړاندې د امریکا او اسرائیل له خوا د جګړې له پیل راهیسې دا ستونزه نوره هم زیاته شوې ده.
