د آلمان پولیسو تېر کال د هغو تاوتریخجنو جرمونو تر ټولو لوړه کچه ثبت کړې چې د ښي اړخو افراطي انګیزه یې درلوده. د آلمان خبري اژانس (DPA) د جمعې په ورځ راپور ورکړ چې دا شمېرې له ۲۰۱۶ کال راهیسې په تېره یوه لسیزه کې تر ټولو لوړې دي.
د آلمان د فدرالي جنايي پولیسو دفتر (BKA) د ۲۰۲۵ کال لپاره ټولټال ۱۵۹۸ دا ډول پېښې ثبت کړې دي (دا ارقام د ۲۰۲۶ کال د جنوري تر ۳۱مې پورې دي). دا معلومات د حکومت له خوا د اپوزیسیون ګوند "د کیڼ اړخو ګوند" یوې پارلماني پوښتنې ته په ځواب کې ورکړل شوي دي.
په ډېری قضیو کې، پلټنې د خلکو د وهلو ټکولو یا سختو فزیکي بریدونو په اړه شوې دي.
د شمېرو له مخې په آلمان کې د ښي اړخو تاوتریخوالی داسې و:
- په ۲۰۲۵ کال کې: ۱۵۹۸ پېښې.
- په ۲۰۲۴ کال کې: ۱۴۸۸ پېښې.
- په ۲۰۲۳ کال کې: ۱۲۷۰ پېښې.
د کیڼ اړخو ګوند پر حکومت نیوکه کړې چې د ښي اړخو جرمونو خطر یې کم ارزښته بللی دی.
په آلمان کې د سیاسي انګیزې په جرمونو کې د دولت او د هغې د نښانو (سمبولونو) سپکاوی، د خلکو پارول او توهین شامل دي. خو په تاوتریخجنو جرمونو کې بیا قتل، فزیکي برید، د عامه نظم ګډوډول، په ترافیکو کې خطرناکه لاسوهنه، غیرقانوني توقیف او د نیول کېدو پر مهال مقاومت شامل دي.
