وروسته له هغې چې امریکا د پاکستان له پوځي اقداماتو خپل ډیپلوماتیک ملاتړ څرګند کړ ، اسلام اباد وویل هغه بریدونه به ونه دروي چې موخه یې پر افغان حکومت فشار راوړل دي.
د فرانس پریس اژانس یوه خبریال په جلال اباد کې د یوې الوتکې د الوتنې غږ اورېدلی او ورپسې یې د ښار د هوایي ډګر له لوري د دوو چاودنو غږونه اورېدلي دي.
د جلال اباد اوسېدونکو هم فرانس پریس ته ویلي چې دوی یو کس ولید چې له الوتکې څخه په پراشوټ راکوز شو او وروسته ونیول شو.
د پولیسو ویاند طیب حماد وویل: "د پاکستان یوه جنګي الوتکه د جلال اباد ښار په شپږمه ناحیه کې وویشتل شوه او پیلوټ یې ژوندی ونیول شو."
په ختیځ افغانستان کې د پوځ ویاند وحیدالله محمدي وویل چې پاکستانۍ الوتکه د افغان ځواکونو له خوا "راوغورځول شوه او پیلوټ یې ژوندی ونیول شو."
د پاکستان د بهرنیو چارو وزارت دا ادعاوې "په بشپړه توګه ناسمې" وبللې.
د افغانستان دفاع وزارت دا هم ویلي چې په تېرو دوو ورځو کې یې د پاکستان پر خاوره هوایي بریدونه کړي، چې څارونکو ویلي ښایي دا بریدونه د بې پیلوټه الوتکو په وسیله شوي وي.
پاکستان د جمعې په ورځ د افغانستان پر پلازمېنه کابل او جنوبي کندهار ولایت، چېرې چې د افغان طالبانو مشر هبت الله اخندزاده مېشت دی، هوایي بریدونه وکړل.
دا بریدونه وروسته له هغې وشول چې افغان ځواکونو د پنجشنبې په ورځ ناوخته پوله ییز بریدونه پیل کړل، چې د طالبانو حکومت وویل دا د پاکستان د پخوانیو بریدونو په ځواب کې وو.
د پاکستان د اطلاعاتو وزیر د شنبې په ورځ وویل چې د عملیاتو له پیل راهیسې د افغانستان په ۳۷ ځایونو کې هوایي بریدونه شوي، که څه هم دا روښانه نه وه چې آیا د جمعې په شپه هم بریدونه شوي که نه.
د پاکستان د لومړي وزیر یوه ویاند، مشرف زيدي، د جمعې په ورځ ناوخته پر اېکس (ټوېټر) ولیکل: "تېري ته د پاکستان سمدستي او اغېزمن ځواب دوام لري."
د امریکا د سیاسي چارو لپاره د بهرنیو چارو وزارت مرستیالې الیسن هوکر له خپلې پاکستانۍ سیالې سره تر خبرو وروسته پر اېکس ولیکل، چې متحده ایالاتو "د طالبانو د بریدونو پر وړاندې د پاکستان د ځان د دفاع له حق څخه ملاتړ څرګند کړی دی."
د دښمنیو په دې چټک زیاتوالي چین، برتانیې، ملګرو ملتونو او د سره صلیب نړیوالې کمېټې هم اندېښنه ښودلې ده.
د افغانستان د حکومت ویاند ذبیح الله مجاهد د جمعې په ورځ وویل چې افغان ځواکونو ۵۵ پاکستاني سرتېري وژلي او څو نور یې نیولي دي. هغه د افغان ځواکونو د وژل شویو شمېر ۱۳ تنه وښود.
د پاکستان د لومړي وزیر ویاند زيدي وویل چې ۲۹۷ افغان طالبان او وسله وال وژل شوي دي. اسلام اباد مخکې ویلي وو چې ۱۲ سرتېري یې وژل شوي دي.
د افغان حکومت مرستیال ویاند حمدالله فطرت ویلي چې لږ تر لږه ۱۹ ملکي وګړي هم په خوست او پکتیکا ولایتونو کې وژل شوي دي.
د دواړو لورو له خوا د مرګ ژوبلې د ادعاوو خپلواک پخلی کول ستونزمن دي.
شنونکي وایي، د دې اونۍ تاوتریخوالي دا په نښه کړه چې دا لومړی ځل دی چې پاکستان خپل هوایي بریدونه د افغان حکومت پر تاسیساتو متمرکز کړي، چې دا د پخوانیو عملیاتو په پرتله یو ښکاره بدلون دی، چې ویل یې وسله وال په نښه کوي.
د ګاونډیو هېوادونو افغانستان او پاکستان ترمنځ اړیکې په وروستیو میاشتو کې خرابې شوي، او د ځمکنیو پولو ډېرې برخې د اکتوبر میاشتې له مرګونو نښتو وروسته تړلې دي، چې په هغو کې د دواړو لورو له ۷۰ ډېر کسان ووژل شول.
اسلام اباد پر افغانستان تور لګوي چې د هغو وسله والو ډلو پر وړاندې اقدام نه کوي چې په پاکستان کې بریدونه کوي، خو د طالبانو حکومت دا تور ردوي.
د ویلو ده چې د تحریک طالبان پاکستان ډلې له ۲۰۲۱ کال راهیسې یې په پاکستان کې بریدونه زیات کړي دي.
پاکستاني ویاند زیدي د شنبې په ورځ فرانس پریس ته وویل چې د شپې له خوا د پوله ییزو نښتو راپورونه نه دي ورکړل شوي، خو هغه وویل ، هغه وسله وال چې له پاکستاني طالبانو سره تړاو لري، د افغانستان د خوست ولایت سره نږدې په شمال لوېدیځ کې پر یوې پوستې برید کړی دی. د دغه برید مسؤلیت سمدستي چا نه دی منلی.
- د خبرو اترو لپاره هڅې -
ایران، چې له افغانستان او پاکستان سره ختیځه پوله لري، د جمعې په ورځ د "خبرو اترو په اسانولو" کې د مرستې وړاندیز وکړ، په داسې حال کې چې سعودي عربستان او قطر د کړکېچ د کمولو لپاره حرکت وکړ. چین وویل چې له دواړو هېوادونو سره "کار کوي" او د ارامۍ غوښتنه یې وکړه.
په جنیوا کې، د سره صلیب د نړیوالې کمېټې مشرې، میریانا سپولیاریچ، وویل چې اداره یې د مرستندویه عملیاتو لپاره چمتووالی نیسي، خو ټینګار یې وکړ چې "هېڅ بشري ځواب د سیاسي ارادې ځای نشي نیولی."
تېر کال د پاکستان او افغانستان ترمنځ د خبرو اترو څو پړاوونه د قطر او تورکیې په منځګړیتوب له اوربند وروسته ترسره شول. خو دغو هڅو د یوې تلپاتې هوکړې په رامنځته کولو کې پاتې راغلل.
سعودي عربستان روانه میاشت د لومړني اوربند له پرله پسې سرغړونو وروسته مداخله وکړه او په اکتوبر میاشت کې د افغانستان له خوا د دریو نیول شویو پاکستاني سرتېرو په خوشې کولو کې یې منځګړیتوب وکړ.
