د روسیې د کامچاتکا ټاپووزمې د ریښتر په کچه د ۸ عشاریه ۸ په شدت سره یوې ډیرې قوي زلزلې ولړزو.
د امریکا د جیولوجیکي سروې ادارې ویلي دي چې د روسیې د کامچاتکا ټاپووزمې په څنډه کې د ریښتر په کچه د ۸.۸ درجې په شدت سره زلزله رامنځته شوې ده.
د زلزلې مرکز په ۲۰.۷ کیلومتره ژوروالی کې موقعیت درلود او د پیټروپاولوسک-کامچاتسکي ښار ختیځ-سویل ختیځ ته ۱۱۹ کیلومتره لرې و.
دغه زلزله سطحي او دومره قوي وه چې د څپو یا سونامي د رامنځته کېدو احتمال یې درلود.
د کامچاتکا والي ولادیمیر سولودوف په ټیلیګرام کې وویل چې زلزله "جدي وه او په تېرو څو لسیزو کې تر ټولو قوي زلزله وه."
د کامچاتکا سیمه ییز روغتیا وزیر اولیګ میلینکوف د روسیې دولتي خبري اژانس تاس ته وویل چې د زلزلې له امله څو کسان ټپیان شوي دي.
"د ټپیانو روغتیايی حالت د ډاډ وړ دی. تر دې دمه کوم جدي ټپونه نه دي ثبت شوي،"
د سونامي د خبرداري وروسته د ساخالین په سیمه کې د سیویرو-کورېلسک کوچني ښار لپاره د تخلیې امر ورکړل شو.
په نورو سیمو کې اغېزې
د امریکا د سونامي خبرداري سیسټم د روسیې، جاپان، الاسکا او هاوای ځینو ساحلي سیمو لپاره د سونامي څپو خبرداری ورکړ.
د هونولولو د بیړني مدیریت څانګې د امریکا د هاوای ایالت په ځینو ساحلي سیمو کې د تخلیې غوښتنه وکړه.
"اقدام وکړئ! د ویجاړونکو سونامي څپو تمه کیږي،"
د سان فرانسسکو د ملي هوا پېژندنې خدماتو د خلیج سیمې وویل چې د کالیفورنیا ساحل لپاره د سونامي مشورتي حالت په ځای دی.
"له اوبو لرې اوسئ! له ساحلونو او اوبو لرونکو سیمو لرې اوسئ! تر هغه وخته له ساحل څخه لرې پاتې شئ چې ځایي چارواکي اجازه درکړي چې بېرته ستانه شئ،"
د امریکا د سونامي خبرداري مرکز هم د ایکواډور لپاره د سونامي خبرداری ورکړ، ویل شوي چې د زلزلې وروسته د ۳ مترو څپو احتمال شته.
د فیلیپین د زلزلو ادارې هم وویل چې د سونامي څپو تمه کیږي، او خلکو ته یې مشوره ورکړه چې د ارام سمندر په مخامخ ساحلي سیمو کې له ساحلونو لرې پاتې شي.
