د ایران د بهرنیو چارو وزیر عباس عراقچي ویلي، د عمان په پلازمېنه مسقط کې به د جمعې په ورځ د سهار په ۱۰ بجو له امریکا سره خبرې وشي. دا په داسې حال کې ده چې د امریکا ولسمشر ډونالډ ټرمپ د ایران ستر مذهبي مشر علي خامنه يي ته خبرداری ورکړی چې باید "ډېر اندېښمن" وي.

د ایران د بهرنیو چارو وزیر عباس عراقچي د چهارشنبې په ورځ په یوه ټویټ کې لیکلي: "له متحده ایالاتو سره اټومي خبرې د جمعې په ورځ د سهار په شاوخوا ۱۰ بجو په مسقط کې پلان شوي دي." هغه له عمان څخه د "ټولو اړینو ترتیباتو د نیولو" له امله مننه وکړه. یوه امریکايي چارواکي هم تایید کړه چې خبرې به په مسقط کې ترسره شي.

دا پرمختګ له هغه وروسته شوی چې د خبرو د ځای پر سر د اختلاف له امله دغه خبرې له خطر سره مخ شوې وې. په لومړي سر کې ټاکل شوې وه چې دا خبرې په تورکیه کې وشي، خو ایران ټینګار کاوه چې خبرې باید عمان ته ولېږدول شي او یوازې د اټومي پروګرام په اړه وي.

د ټرمپ ګواښونه او په سیمه کې پوځي تحرکات

د چهارشنبې په ورځ، د امریکا ولسمشر ډونالډ ټرمپ په یوه مرکه کې وویل چې د ایران ستر مذهبي مشر علي خامنه يي باید "ډېر اندېښمن" وي. ټرمپ وویل: "زه به ووایم چې هغه باید ډېر اندېښمن وي، هو، هغه باید وي." هغه زیاته کړه: "لکه څنګه چې تاسو پوهیږئ، دوی له موږ سره خبرې کوي."

واشنګټن په سیمه کې خپل پوځي ځواکونه زیات کړي دي. ټرمپ سیمې ته د امریکا یوه الوتکه وړونکې بېړۍ استولې او د جون میاشتې د ۱۲ ورځنۍ جګړې پر مهال د تهران پر اټومي او ملکي تاسیساتو له امریکايي-اسرائیلي بریدونو وروسته یې پر ایران د نویو پوځي بریدونو احتمال نه دی رد کړی.

ټرمپ دا هم وویل چې ایران د امریکا له بریدونو وروسته د یوه نوي اټومي تاسیساتو د جوړولو هڅه کوله. هغه NBC ته وویل: "دوی د هیواد په یوه بله برخه کې د نوي سایټ د پیل کولو په اړه فکر کاوه." "موږ په دې اړه خبر شو، ما وویل، که تاسو دا کار وکړئ، موږ به له تاسو سره ډېر بد کارونه وکړو."

د خبرو اترو اجنډا

د امریکا او ایران ترمنځ د خبرو اترو پر اجنډا هم اختلافات موجود دي. امریکا غواړي چې خبرې د ایران د اټومي پروګرام ترڅنګ د بالستیک توغندیو پروګرام او په سیمه کې د نیابتي ډلو ملاتړ هم راونغاړي. خو ایران ټینګار کوي چې خبرې باید یوازې پر اټومي پروګرام متمرکزې وي.