ټرمپ: حماس او اسرائیل د سولې پلان پر لومړي پړاو هوکړه کړې

ټرمپ: حماس او اسرائیل د سولې پلان پر لومړي پړاو هوکړه کړې

ټرمپ وايي، اسرائیل به خپل سرتېري له ټاکل شویو کرښو وباسي او ټول اسیران به خوشې شي.

د امریکا ولسمشر ډونالډ ټرمپ اعلان وکړ چې اسرائیلو او حماس د امریکا له لوري د غزې لپاره د وړاندیز شوي تړون پر لومړي پړاو هوکړه کړې، چې له مخې به یې ټول اسرائیلي یرغمل خوشې شي.

ټرمپ د چهارشنبې په ورځ پر "ټروت سوشل" ټولنیزه شبکه ولیکل: "زه ډېر ویاړم چې اعلانوم چې اسرائیلو او حماس دواړو زموږ د سولې د پلان پر لومړي پړاو هوکړه کړې ده."

ټرمپ زیاته کړه: "د دې مانا دا ده چې ټول یرغمل به ډېر ژر خوشې شي، او اسرائیل به د یوې پیاوړې، پایښت لرونکې او تلپاتې سولې په لور د لومړني ګام په توګه خپل سرتېري یوې هوکړه شوې کرښې ته وباسي."

هغه زیاته کړه، "له ټولو خواوو سره به عادلانه چلند وشي."

ولسمشر دا شېبه د عرب او اسلامي نړۍ، اسرائیل، شاوخوا هېوادونو او امریکا لپاره "یوه لویه ورځ" وبلله.

د مصر "القاهره نیوز" خبري شبکې، چې د دغه هېواد له استخباراتي ادارو سره اړیکې لري، ویلي چې "نن شپه د غزې د اوربند تړون د لومړي پړاو د پلي کولو پر ټولو شرایطو او میکانیزمونو هوکړه وشوه."

حماس تاییدوي

له دې اعلان وروسته، حماس وویل چې له دغه تړون سره موافق دی او د قطر، مصر او ترکیې له هڅو یې مننه وکړه.

دغې ډلې پر ټلګرام په یوه بیان کې وویل: "حماس اعلانوي چې داسې یوه هوکړه شوې چې په غزه کې د جګړې پای، د اشغالګرو وتل، د بشري مرستو ننوتل، او د بندیانو تبادله تضمینوي."

په بیان کې زیاته شوې: "موږ په قطر، مصر او ترکیه کې د خپلو منځګړو وروڼو د هڅو ډېره ستاینه کوو. موږ د امریکا د ولسمشر ډونالډ ټرمپ د هغو هڅو ستاینه هم کوو چې موخه یې د جګړې وروستی پای او د غزې له تړانګې د اشغالګرو اسرائیلي ځواکونو بشپړ وتل دي."

نتنیاهو د 'اخلاقي بریا' ادعا کوي

له اعلان وروسته، د اسرائیل لومړي وزیر بنیامین نتنیاهو وویل چې سبا به د تړون د تصویب او د اسیرانو د بېرته راوستلو لپاره کابینه راوبولي.

د ټرمپ له بیان وروسته نتنیاهو په یوه اعلامیه کې زیاته کړه: "دا د اسرائیل لپاره یوه لویه ورځ ده."

هغه وویل چې دا تړون د اسرائیل لپاره یو "ډیپلوماتیک بریالیتوب" او "اخلاقي بریا" ده.

هغه دې "برخلیک ټاکونکي پړاو" ته د رسېدو لپاره په غزه کې د پوځ نسل وژونکي اقدامات وستایل.

له دوه کلنې نسل وژنې وروسته تړون

دا اعلان پر کلابنده غزه د اسرائیل له لوري د نسل وژنې د پیل له دوهمې کلیزې یوه ورځ وروسته کېږي.

د تېرو دوو کلونو په ترڅ کې، اسرائیلو تر ۶۷،۱۰۰ ډېر فلسطینیان وژلي، چې ډېری یې ښځې او ماشومان دي. کارپوهان وايي چې دا شمېره د پام وړ لوړه ده.

اسرائیلو د دې کلابندې سیمې ډېره برخه په کنډواله بدله کړې او عملاً یې ټول اوسېدونکي بې ځایه کړي دي.