د امریکا ولسمشر ډونالډ ټرمپ هیله څرګنده کړه چې په غزه کې به د اسرائیل او د فلسطین د مقاومت ډلې حماس ترمنځ اوربند تړون ژر تر ژره لاسلیک شي.
ټرمپ د یکشنبې په ورځ په مریلینډ کې د جواینټ بیس انډریوز په هوایي هډه کې خبریالانو ته وویل " د غزې په اړه زمونږ خبرې دوام لري او هیله لرو چې په راتلونکو اوونیو کې به دا مسئله حل کړو."
ټرمپ مخکې اعلان کړی و چې اسرائیل د غزې لپاره د ۶۰ ورځني اوربند اړین شرایط منلي دي، چې دغه وړاندیز قطر او مصر حماس ته وړاندې کړی و.
حماس مثبت ځواب ورکړ او ویې ویل چې دوی د اوربند تړون د عملي کولو او د بندیانو د تبادلې لپاره خبرو ته چمتو دي.
که څه هم اسرائیل ادعا وکړه چې د قطر وړاندیز ته د حماس بدلونونه د منلو وړ نه دي، د دوی پلاوی بیا هم د خبرو لپاره دوحې ته سفر وکړ.
په دوحه کې خبرې د ۶۰ ورځني موقتي اوربند، د ۱۰ ژوندیو اسرائیلي بندیانو خوشې کول او ۱۸ مړو اسرائیلو ته د سپارولو او د دایمي اوربند په اړه به متمرکزې وې.
که څه هم ډیری مسایل حل شوي وو، اصلي ستونزه د اسرائیل ټینګار و چې د غزې شاوخوا د یوې خوندي سیمې کنټرول وساتي.
حتی که اوربند ترسره شي، اسرائیل اعلان کړی چې په رفح کې به پوځي حضور ته دوام ورکړي او د فلسطینیانو د نورو هېوادونو ته د شړلو لپاره به د "راټولولو کمپ" جوړ کړي.
