له برید وروسته انځورونو ښودلې چې ودانۍ په کنډواله بدله شوې، او په ټوله سیمه کې خښتې، سوځېدلي او ویجاړ شوي موټرونه پراته دي.

چارواکو ویلي، ترهګرو د پاکستان په شمال لوېدیځ کې پر یوې امنیتي پوستې موټر بم برید کړې او پر پولیسو یې ډزې کړي، چې له امله یې لږ تر لږه ۱۵ کسان وژل شوي او درې نور ټپیان دي.

د بنو د پولیسو یوه چارواکي، محمد سجاد خان، د یکشنبې په ورځ وویل: "تېره شپه د بنو په فتح خېل سیمه کې، یوه ځانمرګي بریدګر له چاودېدونکو توکو ډک موټر د پولیسو له یو مرکز سره وجنګاوه، چې له هغې وروسته ګڼ شمېر ترهګر د پولیسو مرکز ته ننوتل."

هغه وویل چې د ۱۵ پولیسو مړینه تایید شوې ده. دا د خیبر پښتونخوا په سرحدي ایالت کې د اورپکۍ په هغه څپه کې وروستی برید دی چې د اسلام اباد او کابل ترمنځ یې اړیکې ترینګلې کړي دي.

د چارواکو په وینا، وسله والو له موټر بم چاودنې وروسته پر پولیسو  برید وکړ، ډزې یې پیل کړې او په برید کې یې له کوچنیو بې پیلوټه الوتکو (ډرون) څخه هم کار اخیستی دی.

په بنو کې یوه جګپوړي اداري چارواکي د نوم نه ښودلو په شرط وویل: "د برید پر مهال، اورپکو له درنو وسلو سره سره له کواډکاپټرونو هم کار واخیست."

هغه زیاته کړه: "سربېره پر دې، بریدګرو د شاتګ پر مهال له ځان سره د  ځینې پولیس او وسلې هم وړي دي."

د برید مسئولیت د اتحاد المجاهدین په نوم یوې وسله والې ډلې په غاړه اخیستی دی.

دا ډول وسله وال بریدونه د پاکستان او افغانستان پر پوله د جګړو د بیا پیلېدو احتمال لري. د متحدینو څخه په دښمنانو بدل شویو دواړو هېوادونو ترمنځ تر ټولو خونړۍ جګړه په فبرورۍ میاشت کې ونښته، چې په ترڅ کې یې پاکستاني ځواکونو د افغانستان په خاوره کې هوايي بریدونه وکړل. اسلام اباد ویلي وو چې دا بریدونه یې د اورپکو پر پټنځایونو کړي دي.

له هغه راهیسې جګړې کمې شوي، خو کله ناکله د پولې په اوږدو کې نښتې رامنځته کیږي، مګر تر اوسه کوم رسمي اوربند نه دی شوی.

اسلام اباد پر کابل تور لګوي چې هغو اورپکو ته پناه ورکوي چې د افغانستان له خاورې څخه په پاکستان کې د بریدونو پلانونه جوړوي.

طالبانو دا تورونه رد کړي او ویلي یې دي چې په پاکستان کې ترهګري یوه کورنۍ ستونزه ده.