ایا ایران د امریکا یوه F-35 جنګي الوتکه ویشتلې؟

د ایران سپاه پاسداران ادعا کوي چې په منځني ختیځ کې د تاوتریخوالي د زیاتوالي او پوځي بریدونو د دوام په ترڅ کې یې د امریکا دویمه F-35 الوتکه ویجاړه کړې ده.

د ایران سپاه پاسداران انقلاب  د جمعې په ورځ ادعا وکړه چې د هېواد په مرکزي برخو کې یې د امریکا یوه F-35 جنګي الوتکه ویشتلې ده، دا خبر ایراني رسنیو ورکړی دی.

نیمه رسمي تسنیم خبري اژانس د سپاه پاسداران د یوې اعلامیې په حواله راپور ورکړی چې د الوتکې د ویجاړېدو له امله د پیلوټ برخلیک نامعلوم دی.

دا دویم ځل دی چې ایران د فبرورۍ له ۲۸مې راهیسې د روان تاوتریخوالي په ترڅ کې د امریکا د F-35 الوتکې د ویشتلو ادعا کوي.

امریکا تر اوسه د دې راپور په اړه غبرګون نه دی ښودلی.

ایران تر دې مخکې د مارچ په ۱۹مه هم د امریکا د یوې F-35 الوتکې د ویشتلو اعلان کړی و، خو واشنګټن دا ادعا رد کړې وه.

تهران د پنجشنبې په ورځ د اسرائیلو د یوې F-16 الوتکې د ویشتلو ادعا هم کړې وه.

سیمه له هغه وروسته په تیارسۍ کې ده چې امریکا او اسرائیلو د فبرورۍ په ۲۸مه هوايي بریدونه پیل کړل، چې تر اوسه یې د هغه وخت د ستر مذهبي مشر علي خامنه يي په ګډون له ۱۳۴۰ څخه ډېر کسان وژلي دي.

ایران په ځوابي بریدونو کې پر اسرائیلو، اردن، عراق او د خلیج پر هغو هېوادونو چې د امریکا پوځي شتمنۍ په کې دي، د بې پیلوټه الوتکو او توغندیو بریدونه کړي، چې د مرګ ژوبلې او زیربناوو ته د زیان اړولو ترڅنګ یې نړیوال بازارونه او هوايي چلند هم ګډوډ کړی دی.