د جرمني پوځ د پنجشنبې په ورځ وویل چې د "منځني ختیځ د مخ پر زیاتیدونکي کړکېچ" له امله یې په "موقت ډول" د شمالي عراق له اربیل څخه خپل ځینې سرتېري ایستلي دي. د جرمني د دفاع وزارت یوه ویاند دا خبره تایید کړه.
لسګونه جرمني سرتېري د عراق د کردستان سیمې په اربیل کې له خپلې اډې څخه بل ځای ته انتقال شوي دي.
ویاند وویل: "یوازې هغه پرسونل په اربیل کې پاتې دی چې د کمپ د عملیاتي وړتیا ساتلو لپاره اړین دي."
ویاند د کړکېچ د سرچینې په اړه څه ونه ویل، خو دا ګام وروسته له هغه اخیستل کیږي چې د امریکا ولسمشر ډونالډ ټرمپ په سیمه کې د امریکایي جنګي کښتیو، الوتکو او نورو وسلو د ډېرولو امر کړی او ایران ته یې د پوځي اقدام ګواښ کړی دی.
جرمني سرتېري په اربیل کې د ځايي عراقي ځواکونو د روزنې لپاره د نړیوال ماموریت د یوې برخې په توګه ځای پر ځای دي.
ویاند وویل چې له اربیل څخه د جرمني ځواکونو دغه بیا ځای پر ځای کول "له خپلو څو ملیتي شریکانو سره په نږدې همغږۍ" ترسره شوي دي.
په عراق کې جرمني ځواکونه د ناټو ماموریت (NMI) په ملاتړ فعالیت کوي، چې یو غیر جنګي مشورتي ماموریت دی.
