نواف سلام د وسلو پر کنټرول د دولت پر حاکمیت، له حزب الله سره د جګړې پر مخنیوي او له لبنانه د اسرائیلي ځواکونو پر وتلو یو ځل بیا ټینګار وکړ.

د لبنان لومړي وزیر نواف سلام د چهارشنبې په ورځ وویل چې له اسرائیلو سره د امریکا تر ملاتړ لاندې "چوکاټ" د یوې هوکړې په لور د "مذاکراتو لاره" ټاکي، خو دا په خپله کوم تړون یا معاهده نه ده.

سلام د لبنان له "LBCI" ټلویزیون سره په مرکه کې وویل: "د 'چوکاټي تړون' اصطلاح ابهام رامنځته کوي. موږ د مذاکراتو لپاره د یوه لارښود چوکاټ په اړه خبرې کوو ترڅو د یوې هوکړې په لور لاره وټاکل شي، نه د یوې حتمي معاهدې یا تړون په اړه."

هغه زیاته کړه: "موږ له اسرائیلو سره مذاکراتو ته لېواله نه یو، خو له هغو دوو جګړو وروسته چې په زرګونو کسان پکې قرباني شول، دې مرحلې ته رسېدلي یو." هغه وویل چې لومړیو بریدونو تر ۷ ملیارد ډالرو ډېر مستقیم زیانونه اړولي او دغه راز شاوخوا ۱۳ ملیارد ډالره نور اقتصادي زیانونه یې هم اړولي دي.

سلام وویل چې د دې چوکاټ پلي کېدل باید له لبنان څخه د اسرائیلو د وتلو لامل شي او بې ځایه شوي خلک وکولی شي په خوندي او باعزته توګه خپلو کلیو او کورونو ته ستانه شي. هغه وویل: "زموږ هدف خپلو کورونو ته د سویل د خلکو راستنول او د وینې توېدنې درول دي."

نوموړي د کورنیو مسلو په اړه وویل: "موږ له حزب الله سره مقابله نه غواړو او باید د وسله والې نښتې مخه ونیسو. خو موږ به د کورنۍ جګړې ګواښونو او بلک میل ته تسلیم نه شو او له دې پرېکړې به نه شا ته کېږو چې وسله باید یوازې له دولت سره وي."

تېره جمعه بیروت او تل ابیب د امریکا په منځګړیتوب یو چوکاټ لاسلیک کړ ترڅو له لبناني خاورې څخه د اسرائیلي ځواکونو تدریجي وتلو او په پوله کې د دښمنۍ کمولو ته لاره هواره کړي. دا چوکاټ په هغو سیمو کې چې اسرائیل ترې وځي، د امنیت مسؤلیت د لبنان اردو ته سپارل او د غیر دولتي وسله والو ډلو (په ځانګړي ډول حزب الله) بې وسلې کول د وتلو له پروسې سره تړي.

اسرائیل له کلونو راهیسې د لبنان د سویل ځینې برخې اشغال کړي او د ۲۰۲۳-۲۰۲۴ کلونو په جګړه کې یې نورې سیمې هم لاندې کړې دي. د لبنان د روغتیا وزارت د شمېرو له مخې، د ۲۰۲۶ کال د مارچ له دویمې راهیسې د اسرائیلو په بریدونو کې له ۴۰۰۰ ډېر کسان وژل شوي، ۱۲۰۰۰ ژوبل شوي او له یو ملیون څخه ډېر خلک بې ځایه شوي دي.