د امریکا ولسمشر تر دې وړاندې ویلي وو چې د ایران له "ماتې" وروسته به دا ستراتیژیکه اوبنۍ لاره د متحده ایالاتو خاوره اعلان کړي.
د امریکا ولسمشر ډونالډ ټرمپ، د هرمز تنګي د امریکا د خاورې په توګه د اعلانولو په اړه له خپلو تېرو څرګندونو څو ورځې وروسته، یو داسې انځور خپور کړ چې دغه تنګی پکې د امریکا د قلمرو په توګه ښودل شوی دی.
ټرمپ د سې شنبې په ورځ په خپله ټولنیزه شبکه کې یو انځور خپور کړ چې یوه نقشه پکې وه او پر هغې د هرمز تنګي ته د "امریکا نوې خاوره" نوم ورکړل شوی و؛ دې کار د یادې اوبنۍ لارې د امریکا د خاورې اعلانولو په اړه د هغه پخوانۍ خبرې یو ځل بیا تکرار کړې.
"بشپړ کنټرول"
د اګست په ۱۴مه په یوه غونډه کې د خبرو پر مهال، ټرمپ ادعا وکړه چې د امریکا سمندري ځواکونو د هرمز په تنګي کې بشپړه محاصره (بندیز) لګولې ده.
هغه وویل: "وروسته له دې چې د ایران ماتول مو پای ته ورسول – چې دا مهال له سختې ماتې سره مخ دی – ډېر ژر به د هرمز تنګی د متحده ایالاتو خاوره اعلان کړم."
په یو بل ټولنیز پیغام کې، ټرمپ لیکلي چې امریکا د هرمز پر تنګي "بشپړ کنټرول" لري او باور لري چې واشنګټن کولی شي دغه کنټرول وساتي.
بل خوا، ایراني چارواکو په وار وار ویلي چې تر هغه چې امریکا خپله لاسوهنه او سمندري محاصره پای ته ونه رسوي او د جون په ۱۷مه د تهران او واشنګټن ترمنځ د لاسلیک شوې هوکړې شرطونه پوره نه کړي، دغه تنګی به بېرته پرانیستل نه شي.
